أنـا مريضــة بـالســرطــان

أنـا مريضــة بـالســرطــان

كنت راجع من لافاك..طلعت للطوبيس وشديت طريقي للدار..واقف وسط الزحام..وضارب المزيكة ديال "باد وولفز" فودني..شاد الكتاب ديال "الخيميائي" فيدي وسارح بين أفكاري..طفى ليا التلفون من الشارج وتحبسات المزيكة..شوية بدى الصداع..شي كيهضر فالسياسة وشي كيهضر فالكورة..وديك المرا كتعاود على جارتها المسمومة..كنضور فعيني وكنحاول نستوعب داك الديكور حيت أنا مكنحملش الصداع..شوية جات عيني فعينيها..بقات كتشوف فيا وحدرات راسها كتشوف فالكتاب لي فيدي..ماعرفتش اش بغات تقول ليا..هي زوينة بزاف..شعرها كحل ودايرة نضاضر ديال "هاري بوتر"..وهازة كتاب ديال "كن خائنا تكن أجمل" فيديها..باينة من داك النوع المثقف..

قلت يمكن جات عينها فعيني بالصدفة..ضورت وجهي وبقيت كنشوف فالجهة لخرى وشاد الستون بالخيميائي..الطوبيس بدى كيخوا الناس كيهبطو والبلايص بداو كيخواو وهي باقة واقفة ورايا كتقرا فكتابها وانا عاطيها بالظهر..واحد الشوية حسيت بشي حد قاسني فكتفي..ضرت نشوف لقيتها كتشوف فيا وقالت ليا "ريح هاهي بلاصة خاوية" درت الصواب وقلت ليها شكرا غير جلسي نتي انا نبقى واقف..جاوباتني بابتسامة وقالت ليا غير جلس أنا قربت نهبط..قلت ليها شكرا ومشيت جلست..

جالس وكنفكر فهاد الموقف..واش ناخد نمرتها ؟..تقدر تقمعني حيت انا عمرني زعمت على شي بنت وطلبت نمرتها..وكتجيني هاد الفكرة ممزياناش..واحد الراس كيقول ليا غير زعم وقوليها عطيني نمرتك ومتخافش..سربي قبل ماتهبط..تقدر متعاودش تصادف معاها فالطوبيس..وواحد الراس كيقول ليا خليك فبلاصتك ايلا بغاتك هي غاتهضر معاك بلا متحتاج طلب نمرتها..بقيت كنفكر شوية وقف الطوبيس..ضرت نشوف بانت ليا غادة جيهة الباب..آه وصلات للبلاكة لي غاتنزل فيها..نزلات وشافت فيا من خارج الطوبيس..ماعرفتش واش كتعرفني ولا يمكن تشابهت ليها مع شي حد...

ديمارا الطوبيس ومشيت فحالي..وصل الليل وتلاحيت ننعس وديك الدرية مسيطرة على أفكاري..بقيت ساهي وكنحاول نفهم داك الجيست لي دارت معايا..بقيت كنفكر وشوية نعست...
ضرباتني الفيقة مع الطناش دوشت وفطرت وشديت الطريق لافاك..فالعشية من ورا الكور تفكرت بلي خصني ندوز عند واحد السيد كايبيع الكتوبة قدام لافاك كنت وصيتو على الكتاب ديال "الإخوة كارامازوف" ديال "دوستويفسكي"...وصلت عندو وسلمت عليه وبقيت كنهضر معاه شوية وكانو شي كليان واقفين فجنب هازين شي كتوبة كيقلبوهوم..شوية سولتو على الكتاب لي وصيتو عليه وقال ليا آه راه جبتو ليك هاهوا كتقرى فيه ديك الدرية تسنى نجيبو ليك...

خشيت يدي فجيبي باش نجبد الفلوس ومع هزيت راسي لقيتو كايهضر مع ديك الدرية لي تصادفت معاها فالطوبيس..شير عليا بصبعو وقاليها داك السيد وصاني نجيبو ليه..ضارت شافت فيا وبتاسمات..شوية جات عندي:
- السلام..
- أهلا..نتي هي الدرية لي عطيتيني بلاصة فالطوبيس داك النهار ؟
- مازال عاقل ههه..آه هي أنا..
- أنا من الناس لي كايهتمو بالتفاصيل الصغيرة..داكشي علاش..
- واخا..كنت باغة نشري هاد الكتاب ساعة ديجا ضومونديتي عليه..هاك أسيدي ها الكتاب ديالك وسمح ليا حيت هزيتو..
- لا لا ماشي مشكل..يمكن لك تاخديه وانا ناخد كتاب آخر بلاصتو..
- صراحة مابغيتش نقجر عليك..
- لا مكاين حتى مشكل..خودي راحتك..
- بالمناسبة سميتي "وئام" كنقرى هنا فالبرونش ديال "لابسيكولوجي"..
- آه متشرفين..
- قول ليا فين غانلقاك وكيفاش غنتواصل معاك باش نرجع لك الكتاب ديالك ؟
- أنا نعطيك نمرتي فاش تسالي منو عيطي ليا باش نجي ناخدو من عندك...

عطيتها نمرتي ومشيت فحالي...كنت كانتسنى لابيل ديالها ولكن ماعيطاتش داك النهار..الغد ليه فالليل عيطات ليا..بقينا كنهضرو وتعرفت عليها مزيان..هي كتنتامي لأسرة ميسورة الحال..واليديها عايشين فألمانيا وهي كتقرى هنا فالمغرب وفالصيف كتمشي عندهم..هي ماعندهاش صحاب وكادوز وقتها غير فالكتوبة..بحالي تقريبا..داكشي علاش لاقاتنا الصدفة...عرضت عليها داك النهار باش نديرو كافي بجوج ووافقات..تلاقينا ودرنا كافي وتسركلنا..سولتها على الكتاب ديالي قالت ليا قربات تكملو..كنت كنعاود ليها على "فان غوخ"حيت مات كاعي..داز داك النهار مزيان..كانت فرحانة بزااف..فالليل عيطات ليا وقالت ليا بلي عجبها الحال معايا..واش نقوليها راك عجبتيني ؟ وبلي كنفكر فيها بزاف ولا نتسنى بلاتي..فكرت وقلت بلا مانزرب عليها..نتسنى شوية ديال الوقت..

بقينا كنتواصلو غير فالتلفون وكنتلاقاو مرة مرة..ومن بعد شهر تقريبا غبر ليها الأثر..كنعيط ليها مكتجاوبش نمرتها طافية..ماعرفتش علاش وخفت لا تكون وقعات ليها شي حاجة..قلبت عليها فلافاك وسولت عليها فالكلاص ديالهم والو مالقيتهاش..والغريب فالأمر مكاينة حتى شي درية فديك البرونش بهاديك السمية لي قالت ليا...بقيت كنتسنى لابيل ديالها ساعة ماعيطاتش..غبرات بمرة..
قلبت عليها حتى عييت واستسلمت..وقلت صافي ننساها...كنت دايز حدا داك مول الكتوبة وعيط ليا..مشيت عندو بقى كيدوي معايا شوية جبد ليا داك الكتاب لي خليت عندها..قال ليا راه خلاتو ليك واحد السيدة..قلت ليه واش هاديك لي كانت شاداه فيديها أول مرة وقال ليا ماعقلش عليها مزيان..سولتو ايمتى عطاتو الكتاب قال ليا شي سيمانة تقريبا..بقيت كنسولو وماقدرت ناخد من عندو شي جواب مفيد...

شديت الكتاب ومشيت فحالي..دخلت لبيتي وجالس كنفكر فهاد البلان وكنحاول نفهم هادشي..شوية نضت جبدت داك الكتاب وحليتو..بقيت كنقلب فالوراق حتى وصلت للوسط ديال الكتاب لقيت واحد الورقة بيضاا مكتوبة بستيلو زرق، مكتوب فيها "
السلام..نتمنى تكون حليتي الكتاب وقريتي هاد الورقة..المهم بغيت نقوليك سمح ليا بزاف حيت كذبت عليك..عرفتك قلبتي عليا ومالقيتينيش..وعرفتك كاعي عليا حيت مشيت وماقلت ليك والو..نهار كنا أون صومبل كنت حاسة بيك باغي تقول ليا شي حاجة وتراجعتي...قريتها فعينيك، وكنت كنتمنى ماتقولهاش..كنحس بنفس الشيء ولكن ماقدرتش نقولها ليك..حيت انا ماكنظنش بلي غانعيش بزاف..أنا مريضة بالسرطان وكنتألم بزاف وهادشي خلاني نبعد ونبقى بلا صحاب بلا والو...كنحاول نستمتع بهاد ليام لي بقات ليا..مابغيتش نكون عالة على شي حد...سمح ليا حيت ماقدرتش نواجهك..

قريت هاد الورقة تصدمت..مافهمت والو..قلبت الورقة لقيت واحد النمرة..شديت ديك النمرة وعيطت ليها..جاوباتني:
- آلو..
- تعطلتي..
- علاش درتي معايا هكا ؟
- سمح ليا..ماقدرتش نخبي عليك..وقلت نصارحك بطريقتي..خفتك لا تقلب وجهك ملي تعرفني مريضة..ومبغيتش نوصلو لوسط الطريق وتخليني..
- ملي خفتي..علاش شفتي فيا أول مرة ؟ وعلاش عطيتيني بلاصة فالطوبيس ؟ وعلاش خرجتي معايا ؟ وعلاش خليتيني نولي نبغيك ؟
- خفت حيت..
- حيت يحساب ليك كلنا بحال بحال...لا حنا ماشي بحال بحال..حنا ربما ناس بسطاء ولكن قلوبنا صافية ومشاعرنا صادقة وأحاسيسنا كلها وفاء..وملي كانبغيو كانضحيو وكانوفيو بوعودنا، أنا مستعد نضحي معاك ونموت معاك..ماعنديش مشكل تكوني مريضة..ومكيهمنيش شحال غاتعيشي ولكن لي كيهمني هو ندوز معاك كل ساعة وكل دقيقة وكل لحظة من هاد المدة لي غاتعيشيها...
- الصراحة ماعرفت مانقول..ماظنيتكش هكا..
- ماتقولي والو..قولي ليا فين غانلقاك..راني شريت ليك "ساحرة بورتوبيللو"..
- أواه واش ديال باولو كويلو ؟
- آه..هاداك
- أنا جاية عندك..

بقلــم: الـﺴـــــــﺎﻋــــﺮ