عنــــدمـــــا يطــــاردك المـــــوت.
"مـــزرعــــة هنتـــر كـــافيـــك الغــــامضــــة"
على مر التاريخ وقعو بزاف ديال الجرائم الغريبة بطرق وأساليب مجهولة لي مايمكنش للعقل يصدقها، فيها لي توصل ليها القانون وفيها ماوصلش ليها..وبقات لغز محير للبشرية إلى يومنا هذا..ومن بينها هادي لي غانهضر عليها نمشيو نعرفو ليسطوار..
مزرعة "هنتر كافيك" أو الكابوس المرعب.. هي واحد المزرعة كاينة فواحد القرية سميتها "غروغبن" ألمانيا...هاد المزرعة كانت معزولة بوحدها فواحد الغابة تما...كايسكن فيها واحد السيد سميتو "أندرياس غروبر" ومرتو "سيسيليا غروبر" وبنتو المطلقة "فيكتوريا غروبر" وجوج ولادها صغار..بنت سميتها سيسيليا وولد سميتو جوزيف....هاد العائلة كانو أغنياء من جهة و غريبي الاطوار من جهة بحكم انهم منعازلين على البشر وماكيعمرو مع حد فديم القرية وحتى الكنيسة مكانوش كيحضرو ليها باستثناء بنتهم "فيكتوريا" لي كانت متفتحة شوية وكاتحضر باش تغني فالكنيسة..أما باقي افراد العائلة كانو منعازلين بزاف بسبب الأب "أندرياس" لي كان شخص سادي وكان قبيح وكان ديما وحيد وكولشي كيخاف منو حتى من مرتو كان كيضربها بجميع الأساليب وحتى بنتو "فيكتوريا" كان ضد انها تزوج بشي حد حيت كان كيتحكم فيها وكاينة أقاويل ديال أهل القرية كتقول انه كان كينعس معاها واخا هي بنتو....
هاد العائلة كانت عندهم واحد الخدامة سميتها "ماريا" مدة طويلة وهي خدامة عندهم تال واحد النهار صدماتهم وقالت ليهم بلي مبقاتش باغة تزيد دقيقة وحدة فهاد الدار والخوف كايتقطر منها وملي سولوها على السبب قالت ليهم وليت كنسمع شي أصوات غريبة بعض المرات فالدار وبعض المرات برا وبلي كتسمع شي خطوات ديال شي حد..كان كيحساب ليها الدار مسكونة الشيء لي خلاها تقرر تمشي فحالها وملي وصل الليل ودعاتهم هزات حوايجها ومشات فحالها وفاش سولوهم اهل القرية قالو ليهم را ديك الخادمة عندها اضطراب عقلي ومشات فحالها...من بعدما مشات الخدامة بواحد المدة غاتجي واحد العاصفة ثلجية الشيء لي خلا عائلة غروبر يبقاو فدار وملي حبسات العاصفة الثلجية ناض الأب "أندرياس" خرج يشوف الممتلكات ديالو لي حدا المزرعة ياكما وقعات ليها شي حاجة...بالصدفة غايلقى الآثار ديال الأقدام ديال شي حد وبقى تابع دوك الخطوات حتى وصلاتو لداخل الغابة ودوك الخطوات كان الاتجاه ديالهم للدار ديالو ولكن من جهة خرى...هنا أندرياس وصل للحد ديال الخطوات ومالقى تاواحد..ومن قوة الخلعة رجع كايجري للدار ياكما شي حد دار ليه هاد القالب..وملي رجع مالقى تاواحد المزرعة آمنة وكولشي بيخير...
"أندرياس" من بعدما قلب المزرعة كاملة ومالقى فيها حتى شي حد بدات كاطيح ليه الهضرة ديال الخادمة "ماريا" فراسو ملي قالت ليه الدار مسكونة..ولكن من بعد نسى هاد الهضرة ومشى ينعس..فنفس الليلة غادي يسمع الخطوات ديال شي حد فالطابق الفوقاني..من قوة الخلعة فيق مراتو وهز السلاح وطلع كيقلب والغريب انه مالقى والو..ورجع ينعس والغد ليه خرج كايقلب على دوك الآثار ساعة مالقى والو ولكن ملي رجع غايهز عينو غايبان ليه واحد جورنال فالدار وملي سول مالين دار حتى واحد ماعارف منين جا هاد جورنال وبلي اول مرة غايشوفوه..هنا "أندرياس" غايدخلو الشك بالبيان وغاينوض يسول واحد السيد فديك القرية زعما واش مالاحظش شي حاجة غريبة ساعة قاليه ماسمعنا وماشفنا والو والأمور بيخير...من بعد رجع لدار ومشى بغى يجبد السوارت ديال واحد البيت كايخزن فيه الادوات والماطريال لي كيخدم بيه والغريب انه مغيلقاش سوارت والغريب ايضا انه غايلقى شي خدوش فداك الباب يعني ديجا شي حد حاول يهرس القفل وماقدرش...الغد ليه غادة تجي الخدامة جديدة وسميتها "ماريا غارتنر" يعني من بعد 6 شهور على الرحيل ديال الخدامة القديمة..هاد الخادمة جديدة غايكون هذا اول نهار ليها فالخدمة وآخر نهار ليها فالحياة...
حيت من بعد هاد اللحظة عائلة غروبر غايغبر ليها الأثر وأهل القرية لاحظو هادشي وحتى "فيكتوريا" لي كانت كتحضر ديما للكنيسة غبر ليها الاثر..الشيء لي خلا اهل القرية يشكو بلي كاينة شي حاجة ماشي تال لهيه..وناضو تافقو باش يتجمعو ويقلبو على عائلة غروبر ويعرفو سبب الإختفاء ديالهم..تجمعو ومشاو للمزرعة كايعيطو وكايدقو فالباب وحتى حد مكيجاوبهوم وملي قلبو خارج المزرعة ومالقاو والو قررو يدخلو للمزرعة ومالقاو والو وهبطو للحظيرة ومع حلو الباب غايتصدمو من هول المنظر..لقاو العائلة كاملة مقتولة بواحد الأسلوب مرعب..لقاو كاع الجتث ديالهم تما ولكن باستثناء الخادمة جديدة والطفل الصغير جوزيف..ناضو طلعو للطابق العلوي وتما لقاوهوم مقتولين حتى هوما...من بعد جاو البوليس ودارو تحقيق وقالو بلي الجريمة وقعات لهاد الناس قبل ماينعسو حيت كولهم كانو لابسين حوايج نعاس باستثناء فيكتوريا وبنتها..والنقطة لخرى لي توصلو ليها هي ان القاتل كان مخبي فالحظيرة وكان كيستدرجهم واحد بواحد وكاينزل عليهم بالشاقور للراس الشيء لي كايسهل عملية القتل والفحوصات بينات ان فيكتوريا كانت فيها آثار الخنق وبنتها بقات حية واحد المدة عاد ماتت والحاجة لخرى لي لفتات الانتباه ديال المحققين هي الطريقة باش كفن القاتل الجثت..
من الاشياء لخرى لي لفتات الانتباه هو ان اهل القرية قالو بلي قبل مايكتاشفو الجريمة كان واحد الدخان كايخرج من المزرعة وهذا دليل ان شي حد كان فالدار وحتى البوليس لقاو الشياطة ديال الماكلة والغريب ايضا انهم لقاو البهايم شي حد وكلهوم وشربهوم من بعد موت العائلة بسيمانة..البوليس قالو ان شي حد بغى يسرق اموال العائلة وهجم عليهم بحكم ان عائلة غروبر اغنياء..ولكن الغريب ان القاتل ماخداا حتى فرانك وكان بإمكانو يهز الفلوس والمجوهرات ويهز لي بغى..كما ان التحقيقات بينات ان فيكتوريا ديجا تبرعات للكنيسة بفلوسها كاملة قبل ماتموت بسيمانة...هنا البوليس غايجمعو بزاف ديال المشتبه فيهم وهنا غايشكو فواحد خونا سميتو "لورنز شيلتنبور" هاد خونا كان ديجا فعلاقة مع فيكتوريا فواحد الوقت والبوليس قالو ان ولدها جوزيف ولداتو معاه وبلي كانت ناوية تدعيه على النفقة وقالو بلي هذا هو السبب لي خلاه يقتلها ويقتل عائلتها..وملي سولوه البوليس قاليهم ماشي ولدي هذاك الولد ولداتو مع الأب ديالها أندرياس حيت كان كينعس معاها وبلي كولشي عارف هادشي...وقالو تاني بلي ربما قتلها بسباب الغيرة..ولكن كانت اصابع الشك كولها متوجهة ليه حتى من طرف اهل القرية...
حيت هاد "لورنز" هو من الناس لي قررو يقلبو على عائلة غروبر فاش غبر ليهم الأثر..وحتى ملي شافو الكلب ديال العائلة بدى كاينبح عليه..وملي شافو الناس الجثت كولهم تصدمو باستثناؤو هو ماتخلع ماتصدم ماوالو ومشى هو حول الجثت من بلايصهم وحتى الدار كان حافظها مزيان وملي سولوه البوليس قاليهم كنت كانقلب على ولدي جوزيف ولكن مع ذلك ماقدرو يديرو معاه تاحاجة حيت معندهوم حتى دليل عليه وكانو شاكين فزوج فيكتوريا اللول "كارل غابرييل" لي قالو انه مات فالحرب العالمية اللولة ولكن مكاين حتى دليل كايبين انه مات كما انه حتى هو غبر ليه الأثر وقالو هو زيف الموت ديالو وملي رجع من الحرب وكتاشف علاقة فيكتوريا بالأب ديالها وقرر ينتاقم منها هي وعائلتها..ولكن لي كتافاو بيه بعض اهل القرية هو ان عائلة غروبر لي قتلها ماشي كائن بشري...من بعدما عجزات الشرطة على فك لغز الجريمة سدو الملف وناضو اهل القرية وريبو المزرعة وحرقوها وفعام 1998 ناضو شي طلاب وحققو فهاد القضية وتوصلو لواحد السيد كانت الادلة كولها متوجهة ليه ولكن بحكم انه مات قررو هاد الطلبة ينساو الأمر مراعاة للأهل ديالو وتسد الملف بصفة نهائية...وكتعتابر هادي وحدة من أغرب الجرائم وأكثرها لغزا فتاريخ البشرية...نتلاقاو فشي موضوع خر..
بقلــم: الـﺴـــــــﺎﻋــــﺮ
Gerard Lopez
Commentaires