"قصتـــــي مـــع الإكتئـــــــاب"
بــــــارت 4.
..قلت ليها شكرا، خصني نمشي هاد ساعة ومشيت باش نتلاقى مع عادل ودوك الناس لي غايعرفني عليهم...شوية عيط ليا عادل قال ليا جي عندي انا فالبلاصة فلانية..مشيت عندو قال ليا يالاه نشوفو دوك ناس..مشيت معاه وصلنا عندهم كانو شي 6 ولا 7 دناس كولهم ملتزمين كيقراو فشعبة الدراسات الإسلامية..كولهم لابسين فوقيات وطرابش باستثنائي أنا..موهيم وصلنا سلمنا عليهم شوية قدمني ليهم عادل وتعرفت عليهم ورحبو بيا باش نكون واحد منهم ونلتازم معاهم..وافقت بكل برودة..شوية نقز واحد السيد هو الكبير فيهم كايعيطو ليه ب"الكبير" وقال ليا: انت باينة فيك مكرفص ومهموم، قلت ليه آه عندك الحق..عاود سولني قال ليا: واش باغي ترتاح ياك ؟..قلت ليه آه..قال ليا: راك فالطريق الصحيح وان شاء الله مشاكلك كولها غادة تحل غير شوية ديال الصبر والايمان والتباث وشوية ديال القناعة والامور غادة تكون بيخير، هادشي علاش تولدنا باش نتمحنو باش الله يجازي كل واحد فينا على قد صبرو...قلت ليه واخا حنا فيد الله..شوية قال لعادل أجي معايا ومشى معاه لواحد القنت ماعرفتش اش كان كيقوليه بالضبط شي 10 دقايق وهو كايدوي معاه وعادل غير حادر راسو وكايتصنت، واحد اللحظة بان ليا جبد شي حاجة وعطاها ليه وفنفس الوقت ضار عندي كيشوف فيا وانا شفتو وحدرت عيني درت راسي ماشفت والو..شوية تمو راجعين عندنا..وقال لينا داك الكبير فيهم: سيادنا السلام عليكم حتى نعاودو نتلاقاو ان شاء الله..يالاه تمينا غادين وهو يشدني من كتفي قال ليا تسنى انت..بقى كيتسنى حتى مشاو لخرين وهو يبدى يشوف فيا..انا من قوة الهموم لي كانت فيا ماقدرتش نبقى نشوف فيه، كنت حاس براسي واقف مع شي وحش بغى يعلمني كيفاش نواجه العالم..بغى يعلمني كيفاش تكون عندي كاريزما ونكون قاصح، شوية قال ليا: شوف أعبد الله خصك تعرف حنا غانعيشو مرة وحدة لذلك خصنا نديرو جهدنا كامل باش نستغلة الوقت ونرضيو الله ونضمنو جنة، مشاكلك ما هي إلا ابتلاء من الله باش توب وترجع للطريق وكاع هاد دراري لي كانو واقفين معانا دابا كولهم عندهم مشاكل ولكن ملي جمعتهم ودخلو معانا ولاو مرتاحين وملتازمين وايمانهم بالله قوي مايزعزعو لا مشكل لا جوج وراك غادي تكون بيخير ان شاء الله وكولشي غايكون مزيان حيت هادي هي الطريق الصحيحة..قلت ليه ان شاء الله..شوية قال ليا: انطلاقا من هاد اللحظة غادي دير اي حاجة قلتها لك ولا اي حاجة قالها لك عادل، حيت هنا كنخدمو بقواعد وقوانين خصك تحتارمها وتلتازم بيها..واخا أسي عبد الله ؟..قلت ليه: واخا...شوية قال ليا غادي تحيد ديك الحسانة وغادي تاخد واحد الأمانة من عند صاحبك عادل وغادير اي حاجة قالها لك وأهم حاجة هي أي حاجة تبغي ديرها خصك تشاور معايا واخا أسي عبد الله ؟..حدرت راسي وقلت ليه واخا..قال ليا الله يرضي عليك يالاه سير دابا ماتعطلش على صاحبك..صافي مشيت لقيت عادل كيتسناني وقال ليا مالك تعطلتي..قلت ليه غير داك السيد بقى كينصح فيا..صافي مشينا وانا فراسي شحال من سؤال..شحال من حاجة كاضور ليا فراسي ولكن ماقدرت نقول والو، بقيت غير ساكت وكانشوف فيه بنص عين..كيبان فرحان ومرتاح ولكن كنت حاس بيه مخبي شحال من حاجة، ومع ذلك ماقدرتش نسولو..مشينا فحالنا ملي وصلنا قال ليا نتلاقاو فجامع ومن ورا الصلاة غاتمشي معايا للدار..قلت ليه واخا صافي ان شاء الله...مشيت ديك ساعة حسنت شعري ودرت الحسانة لي كانت الواليدة كتمناني نديرها شي نهار..شحال بكيت داك نهار..واخا هي ماشي الواليدة الحقيقية ديالي..لي بقى فيا هو انني تبدلت على قبل بنادم وماتبدلتش على قبل لي رباتني..شحال كنت مريض شحال كنت مسخوط..مسحت دموعي وتوضيت ومشيت للجامع باش نصلي العشاء.. وتلاقيت مع عادل تما وصلينا مجموعين وملي سالينا رجعنا فحالنا ومشيت معاه للدار تعشينا ومن بعد جبد ليا واحد الميكة قال ليا سيفطها لك الكبير...موهيم حليت الميكة لقيت فيها جوج فوقيات وجوج طرابش وسباط وجوج تقاشر وواحد التسبيح وشي روايح..بقيت غير كنشوف..شوية قال ليا عادل: هو سيفطهم لك كادو من عندو حيت وليتي معانا فالمجمع..قلت ليه واخا الله يخلف عليه..شوية قال ليا هذاك راه كان إمام فشي مسجد وبلي دازت عليه حتى هو وبقى كيعاود ليا عليه..شوية زعمت وسولتو قلت ليه دابا اشنو غانبقاو نديرو ؟..جاوبني قال ليا حنا كنعبدو الله وكنديرو داكشي لي كايرضيه وداكشي لي خصو لي يدار..قلت ليه آه واخا، رغم ان جوابو ماقنعنيش وكنت حاس بلي كاينة شي حاجة..شوية مشيت فحالاتي للدار..بقيت جالس كانفكر فهاد الحريرة..كانقول مع راسي اش هادشي واش هادشي بصح ولا كنحلم، وصل الغد ليه عيط ليا "الكبير" قال ليا جي عندي لافاك باش من بعد تحضر معايا لواحد المجمع...يتبع..
بقلــم: الـﺴـــــــﺎﻋــــﺮ
Commentaires