آجـــي تشــوف فيــن كــاتمشـــي فلـــوسـك.

آجـــي تشــوف فيــن كــاتمشـــي فلـــوسـك.

المغرب عمرو ماكان دولة فقيرة..وعمرو ماكان بلد نائي..المغرب جنة سول عليه مول الشكارة،..كانعيشو فواحد الوضع جد مزري، ناس كتموت بالجوع فجرادة والريف..ناس منفية فالجبال..ناس مرمية متشردة فالزناقي..ناس مليوحة ومهمولة فالسبيطارات..التعليم زيرو..التطبيب زيرو..البنية التحتية زيرو..السكن والتوظيف زيرو..حتى حاجة ماكتفرح الوضع غادي من سيء لأسوء...والسؤال علاش ؟ علاش هادشي ؟...واش حيت المغرب بلد فقير ؟ طبعا لا، حيت ايلا كان المغرب فقير؛ علاش علاش كايضيع زبابل ديال الفلوس فوالو ؟ علاش غادي يخصص 13 مليار باش يدير حملة لتنظيم كأس العالم 2026 ؟ واش كيحساب ليك الملف ديال الطلب والحملة ديال طلب التنظيم داروهوم فابور ؟ لا راك غالط بزااف..13 مليار مشات غير فالحملة والطلب ديال تنظيم كأس العالم 2026..داك اللوغو لي شحال ضحكنا عليه راه طلع ب13 مليار..واش المغرب فقير ؟
واخا إيلا كان المغرب فقير علاش غادي يخصص حوالي 15 مليار لمهرجان موازين مع العلم أن كل الإحصائيات كتقول ان هاد المهرجان الميزانية ديالو هي 80 مليار وكاؤجي واحد يقولك را ميزانية المهرجان كنجمعوها من عائدات الإشهارات ومن المساهمات الرسمية وشوية ديال البركة من عند اتصالات المغرب وشوية من عند بعض الريوس الكبار..سمح ليا راك غالط بزاف هاد الفلوس وهاد الميزانية كايخلصوها من المال العمومي..من فلوسك وفلوس الشعب ومتنساش أنه فعام 2010 و2011 خدات الدولة 5 المليار من مجلس المدينة ديال كازا زائد واحد البركة خداتها من عند المكتب الشريف للفوسفاط لي مكاتخد منو انت حتى فرانك، زائد شوية ديال البركة من صندوق الإيداع والتدبير...وهادشي كامل باش تنظم واحد المهرجان عالمي وتجيب فيه أكبر المشاهير والفنانين..علاش ؟ باش العالم يعرف ان المغرب بلد ثقافي بامتياز وبلد متعدد الثقافات وباش نزيدو فالسياحة ووووو...واش المغرب فقير ؟

واخا إيلا كان المغرب فقير علاش الدولة كاتخصص اكثر من 14 مليار للأضرحة والزوايا ؟ مع العلم ان المغرب فيه 5038 ضريح و1496 زاوية..علاش ؟ كايقولو لك را هاد الاضرحة وهاد الزوايا هي لي كاتخلي المواطنين يتشبثو بالإسلام والقيم ديال الاولياء الصالحين لي ديجا شبعو موت وماتو قرون هادي...وبلي هاد الأضرحة كتحقق لدوك الناس لي كايزوروها الرغبات ديالهم بحال الزواج بحال الولادة ومن بين هاد الأضرحة، نفكركوم فضريح "الرداد" لي قريب لمدينة أزمور وكيقولو لك خاص بعلاج النساء العقيمات زائد ضريح عيشة البحرية لي خاص بتزويح البايرات العانسات..واش ماشي مهزلة هادي ؟...يعني هاد الاضرحة كتعالج مشاكل الناس لذلك خصنا نهتمو بيها ونطهلاو فيها وبناء على هذا كتخصص ليها الدولة ميزانيات وهبات مالية من عند الملك شخصيا لهاد الزوايا وللناس لي مكلفين بيها بحال ضريح محمد أمزيان ومولاي عبد السلام والزاوية التيجانية والبودشيشية وباش يتبتو بنادم قالك هاد الزوايا كتعتامد عليها الدولة باش تحارب التطرف....واش المغرب فقير ؟

طبعا ماشي فقير وعمرو ماكان فقير..هادشي لي ذكرت ☝ غير شوية من بزااف بلا مانهضرو على الزبالة ديال الفلوس لي مخصصة للسياحة ووزارة الثقافة...بلا مانهضرو على عائدات الصيد البحري لي كتجاوز 15.7 مليار وبلا منهضرو على عائدات المنتوجات الغدائية الزراعية والبحرية لي واصلة ل400 مليار فكل سنة..وبلا منهضرو على عائدات الفوسفاط لي واصلة لأكثر من 24 مليار وبلا مانهضرو على فلوس البترول وبلا منهضرو على أكثر من 13 مليار ديال عائدات الحشيش وزيد وزيد...السؤال المطروح هاد الزبالة ديال الفلوس فين كاتمشي ؟ هاد الإسراف كامل ومع ذلك الناس كاتموت بين ليلة وضحاها..ومع ذلك الناس مليوحة للزناقي..ومع ذلك البنية التحتية زيرو..والصحة والتطبيب زيرو..والتعليم زيرو..بقات فالمهرجانات والزوايا والأضرحة..ديك زبالة ديال الفلوس لي غانخسرها على الضريح ديال واحد السيد لي مات ف 1400 وشبع موت نبني بيها سبيطار..نبني مدرسة..ندير للناس فين يخدمو..ديك الزبالة ديال الفلوس لي كاتمشي فالمهرجانات والزوايا والأضرحة ندير بيها مشاريع ونصلح بيها البنية التحتية ونقاد بيها التعليم ونحسن بيها الوضعية..صلحو بيها البلاد عاد فكرو فالمهرجانات وديك العياقى الخاوية..طبعا هادشي لي خصو يكون..ولكن لا وألف لا هاد الناس كولهم شفارة كاينهبو بالعلالي ومكتهمهمش لا انت لا بلادك لا الزعتر ديالك لي كيهم الابناك فسويسرا وبنما تكون عامرة..هنا تعرف أن الخلل مكاينش فالفقر والامكانيات..حيت الفلوس والمداخيل ديال هاد البلاد لا تعد ولا تحصى...الخلل كاين فالشفارة ديال هاد النظام..وكاين فالدولة وحكومة الكراكيز..وكاين فالشعب لي مازال غاطس فالنعاس ومازال مابغاش يوعى ويعيق بالقالب ومامسوقش فالوقت لي لخرين كايعمرو وينهبو وانت يا الدمدومة بقى تقول المغرب فقير وتحسنى التغيير يطيح عليك من السما....فالويل لمن نطق بالحق وتحدى المشانق وراح للموت خدني خدني مبتسما يقبل ويعانق، وحضارتكم على أنقاض غيركم ونسبتم لأنفسكم كل شيء وحدفتم إسم السارق، حتى انكم اتهمتم بالجنون كل ناطق، إذا سيطرتم على الغرب والمشارق يبقى الحق متربعا في عرش علوي شاهق، والزوال مصير كل من يظن نفسه الذكي الحادق..لا تنسو تلك الفوارق..مهما أسرعتم فأنتم مع الفراعنة كأقرب مثال للبطارق...

#الســــاعــر