لنكـــــن شعــــب واعـــــي "دقيقة من وقتك"

أيها الأحرارا، سكتنا هادي سنين..سكتنا لمدة 62 عام، ملي خرج الإستعمار ظنينا بلي الوضع غادي يتقاد وغادة تحسن الأمور، ولكن كنا غالطين بزاف حيت ملي كيتلاقى واحد النظام فاسد بواحد الحكومة فاسدة وبواحد السياسة فاسدة هنا ماعليك غير تنعس على كرشك وتوجد ظهرك للدق، هادشي عشناه لمدة 62 سنة حيت عمرنا مافكرنا نزيدو القدام..عمرنا مافكرنا نغيرو الوضع..كانتسناو الوحي..بغينا التغيير ولكن واش درنا شي مجهود ؟ لا، فقط بقينا ساكتين وكنتسناو الوحوش يرحمونا، طيلة 62 سنة عمرو بزاف ديال الأبناك على ظهرنا..طيلة 62 سنة عمرو بزاف ديال الجيوب على ظهرنا..طيلة 62 سنة تنهبو ثرواتنا..تهضمات حقوقنا..تهانت كرامتنا..تهرسات السمعة ديالنا..طيلة 62 وهوما كيعاملونا بحال القطيع، الدولة تدخل الحشيش والمهلوسات وتطلق اللعب لتجار المخدرات وأباطرة التبزنيز باش تكلخ الشعب وخاصة الشباب..علاش الشباب ؟ حيت الشباب هم عماد المجتمع إذا صلح الشباب صلح المجتمع وإذا فسد الشباب..فسد المجتمع، التغيير ماغديش يديروه جدودنا وماواتنا وواليدينا..لا أبدا، التغيير غادي نديرووه أنا وأنت ونتي ولخرين، حنا لي غانصنعو التغيير..كيفاش غانصنعوه ؟ غانصنعوه بالوعي..ملي نوعاو بلي الدولة والنظام عمرهم ماغادين يكونو فصفنا وعمرهم يكونو فجنبنا وعمرهم غايديرو شي حاجة لي ماعندهومش فيها رباح..ربما الجميع اليوم لاحظ الوضع المزري ديال التعليم لي هو لاباز ديال الوعي لكن مع ذلك الدولة ماصلحاتش التعليم ولكن دخلات برامج دراسية جديدة كلها كاتمجد وكاتقدس الطاغوت السادس، فالوقت لي كان خصها دير برامج لي غادة طلع لينا جيل مربي وواعي...ولكن لا حيت ماشي فصالحها يكون عندنا شعب واعي...حيت نهار يوعى كولشي غانطيحو معاهم للضس وغانخرجو فيهم طول وعرض والدولة باش تجنب هادشي طلقات البزنازة وطلقات الكالاخ من جهة باش يبقى بنادم ديما داخل سوق راسو..مايسولش على الثروة ومايقاطعش المنتوجات ومايعطيش رأيو فالسياسة..ملي قاطعنا المنتوجات ديالهم ناضو لينا بالسبان ولكن نساو بلي هوما أكبر الخونة فاش كيمرضو كيتعالجو برا فاش كيبغيو يقريو ولادهم كيسيفطوهوم برا وملي كايبغيو يفوجو كيسافرو برا..علاش ميتعالجوش هنا ؟ علاش مايقريوش ولادهم هنا ؟ علاش ماخدموش بلادهم ؟ علاش ماصلحوش التعليم وعلاش ماصلحوش الطب ومبناوش سبيطارات ؟ شكوناهوما الخونة حنا ولا هوما ؟..هاد الناس كولهم شفارة من البرلمان تال القصر وكون مكانتش عندهم خسارة فهاد المقاطعة كاع ماينتاقدوها، حيت هوما والهولدينغ الملكي الأخطبوط الناهب والمحتكر عندهم يد فهاد الشركات لذلك ماعندهمش رباح ايلا قاطعناها وماشي فصالحهم...خصنا نكونو شعب واعي حيت بالوعي كايتعطى الرأي وملي كايولي عندك رأي كاتولي عندك السلطة الشعبية باش تأكصيبطي وترفض أي حاجة مخداماش لك وأي لعبة بغات ديرها الدولة كتشاور مع الشعب هو اللول واش قابل ولا لا، شوفو بعض الدول الغربية ملي شي دولة كادير شي حاجة ماقابلش عليها الشعب كولشي كاينوض والدولة بزز منها كاتلغي داكشي...واش هادشي عندنا هنا ؟ طبعا لا، حيت هادوك الشعوب فاقو..وحنا باقين ناعسين لمدة 62 سنة...شوفو وزير كيتعطل 5 دقايق كيعتاذر وكيقدم استقالة حيت ايلا مدارش هكاك غايجبد عليه النحل..شوف هنا كيف كيعاملو المواطن بحال شي بهيمة حيت عارفين بنادم ماعلبالوش ومافيهش غرام ديال النفس..وتيقو بيا كون شي برلماني أو وزير قال على شي شعب فأوروبا مداويخ والله مايزيد فيها نهار ولكن لا مايقدرش ينقص من قيمة المواطنين حيت غادي يجيبها فراسو....ولكن فواحد الدولة شعبها بعيد كل البعد على الوعي راه يسمعوك أسوء ماكاين فالسبان....التفيير مابعيدش..فقط نكونو واعيين ونكونو عارفين بلي هادشي لي كانطالبو بيه راه حقنا وحنا ماشي ضياف عندهم، هاد الأرض ديالنا بغاو ولا كرهو را ماتت فيها ملايين الأرواح وكولهم من الطبقة الكادحة...ماتو فيها جدودنا فالوقت لي كانو هوما مخبيين كي العاهرات فقصورهم ويلقيو الخطابات وينسبو لريوسهم تاريخ بعيد عليهم...جا الوقت باش بنادم يفيق ويوعى ونقولو باراكة من هاد الحبس...جا الوقت باش نهضرو ومنبقاوش ساكتين..بدينا بمقاطعة المنتوجات الإحتكارية غادي ندوزو للسياسة والانتخابات غادي نقاطعو دوك الكراكيز ودوك القرودة لي ماعطاو حتى شي اضافة لهاد البلاد من غير الهضرة الخاوية...جا الوقت باش نغيرو الوضع بيدينا ونعيشو فكرامة بحالنا بحال كاع الشعوب..جا الوقت باش نهضرو ولا نسكتو بمرة...

#الساعر

ثقافة المقاطعة
انتهى وقت الصمت "المقاطعة"