والمقاطعة راها فكرة حرة ماشي حزب وماشي جمعية "ثقــــــافــــــة المقــــــــﺎطعــــة"

دقيقة من وقتك.

"ثقــــــافــــــة المقــــــــﺎطعــــة"

بداية..تحية لأبناء الشعب الأحرار لي مكيتسناو حتى شي حد يمثلهم..مكيتسناو حتى شي حد ينعت ليهم الطريق ويوريهوم آش يديرو...لي بغيت نهضر عليه فهاد البوسط هو ديك الهضرة لي ضايرة هاد ليامات بخصوص بعض المشاهير لي خانو الشعب كيف كتقولو حيت ماعطاوش رأيهم فالمقاطعة أو حيت مادعموش الشعب ومشاركوش فالمقاطعة...

حنا ملي كنكعاو على قبل  أمور بحال هادي راه باقي ماوصلناش للنضج الفكري..وباقي معندناش ثقافة المقاطعة..حيت إيلا كنا حنا الطبقة الكادحة والفقيرة خدينا فعلا فكر المقاطعة كسلاح راه مامحتاجينش لشي واحد يدعمنا ولا يعطينا رأيو حيت ايلا طلبنا شي حد من دوك لي كيعتابرو ريوسهم شي حاجة هنا كنكونو ضربنا المبادئ ديالنا فالزيرو حيت فهاد الموقف بحالا ركعتي لشي طاغية وطلبتيه باش يوقف الحرب فالوقت  لي كان خصك تحارب وتقاتل وتنهي الحرب بيدك...

من المشاهير لي عطيتيهوم قيمة هاد ليامات هو داك خونا رشيد رفيق لي نايض كولشي حاقد عليه حيت معطاش رأيو فالمقاطعة...بيني وبينك رأيو باش غايفيدنا ؟ واش ايلا عطى رأيو غادة تنقص الأسعار ؟ ايلا عطى رأيو واش الحليب غايولي بجوج دراهم والمازوط ب5 دراهم ؟ طبعا لا صوتو ماغيزيد ماغينقص حيت هنا كاتحكم الأغلبية، ايوا لاش هاد الغباء علاش كاتكبرو الشان لبنادم وكانخليوه يحس براسو شي حاجة ؟ واش هاد السيد لي كاطلبو منو يعطي رأيو واش عندو شي منصب كبير واش عندو شي سلطة ؟ لا، هو فقط دمية من دمى التلفزة والإعلام، هاد الشخص راه هو بذاتو منتوج، بحالو بحال الحليب بحال المازوط بحال سيدي علي..هاد المنتوجات ب4 كتشوفوهم فالتلفازة ولا لا ؟ طبعا كاتشوفوهم...ضونك علاش غادي نطلب واحد المنتوج يعطيني رأيو فواحد المقاطعة ديال واحد المنتوج آخر لي كايدوز فنفس التلفزة لي كايدوز فيها هو بذاتو ؟ علاش غانطلب من رشيد رفيق يعطيني رأيو فمقاطعة حليب سنطرال وهو ديجا كايدير إشهار ديال بعض المنتوجات ديال نفس الشركة ؟...راه أي واحد مسيني عقد ولا كيخدم مع شي شركة وسولتيه على المقاطعة ديال ديك الشركة لي مسيني معاها غايجاوبك بنفس الجواب وغايقولك سمح ليا...وبلا ماندخلو فالتفاصيل...صحيح الشعب هو لي طلعو وعطاه الشهرة ولكن هذا مكيعنيش أنه شي حاجة..كيف قاطع كيف ماقاطعش صوتو ماغيزيد ماغينقص...

 لي بغيت نأكد عليه هو أننا ممحتاجين لحتى شي حد نهائيا كيما بغى يكون نوعو وكيما بغى يكون المنصب ديالو...يكفي تكون عندك روح المقاطعة فدماغك وتآمن بيها كفكرة وكسلاح راقي..قاطع وماتهضرش..قاطع وماتحاشيها لحتى شي حد ولي بغى يدوي يدوي..وبالنسبة لشي وحدين كيقولو لك قتلكوم جوع والحليب جاكم غالي...آه حتى المازوط كايجينا غالي هاهوما تجار المحروقات ضربو 17 مليار درهم على ظهرك غير بدرهم وجوج دراهم فكل إيطرو وانت يا الدمدومة بقى حال فمك كي الحماار وبقى تقول ليا قتلكم جوع مقادينش تشريو الحليب والمازوط...أنا كنقاطع هاد المنتوج حيت بغيت نقاطعو وحيت كيحتاقرني وكايرجعني بحال شي حمار...أما أنت إيلا كنتي دمدومة شريه ولا ضبر راسك...

وبالنسبة لدوك راكبي الأمواج لي كيعتابرو ريوسهم قادة ديال المقاطعة..حنا ماعندناش قائد والمقاطعة راها فكرة حرة ماشي حزب وماشي جمعية وماشي حركة سياسية وماشي غنم..كاتفهم ؟ ماشي غنم وسطر عليها مزيان..كل واحد قائد لراسو..أنا كنقاطع هاد المنتوجات بخاطري وبكامل الإرادة ديالي ماكيوجهني حتى واحد وماكيتحكم فيا حتى حد واخا نبقى مقاطع بوحدي..كنقاطع هاد المنتوج حيت أنا بغيت ماشي حيت انت فرضتي عليا..حيت ايلا كنتي انت أو نتوما كتعتابرو ريوسكم قادة وعينكم فشي حاجة..سمعني نقولك راني ممعتارفش بك وماتمثلني مانمثلك..كنمثل راسي براسي ويلا بغيتو طلعو على ظهر شي حد شوفو شي قنت آخر را حمضتو هاد القنت...حيت حنا مابقات عندنا ثقة فحتى واحد لا فالأحزاب لا فالحكومة لا فغيرهم..كنمثلو ريوسنا بريوسنا..كنقاطعو المنتوجات بكامل الإرادة ديالنا..كنسيرو ريوسنا بريوسنا..وماكنتسناو حتى شي قندوح وحتى شي قرد يدافع علينا...حيت اليوم كولشي تفرش كولشي تفضح..بانو صحاب المصالح وعرفنا بلي كولشي تابع مصلاحتو..وعرفنا بلي ضحكتو على الشعب..مابقى لا ثقة لا والو..بدينا بسنطرال وافريقيا وسيدي علي دابا غاندوزو للحكومة الفاسدة لي هي أكبر ممول لهاد الفساد وهاد الوضع المهمش لي ولينا فيه...حيت ملي واحد الشركة باغة تخفض الأسعار وتخضع لإرادة الشعب وتدخل الحكومة وتقوليها لا غادصري علينا الشعب هادي هضرة خرى...وانا شخصيا مجاتنيش عجب..شحال من حكومة دازت فالمغرب الحمار لي جا يعمر جيبو ويزيد والوضعية هي هي من مكفس لأكفس...ودابا سالا وقت السكات دابا جا وقت الحساب...

#الساعر