"اليـــوم العـــالمـــي للمـــرأة" تــــاريـــخ انتفــــاضـــة نســــويـــة

"اليـــوم العـــالمـــي للمـــرأة"
 تــــاريـــخ انتفــــاضـــة نســــويـــة

كل حركة عندها نتيجة، هذا هو المبدأ لي خصنا نآمنو بيه، وخصنا نآمنو انه اي حاجة وقعات واي حاجة كتوقع راها نتيجة ديال واحد الحركة وواحد السبب...نمشيو للموضوع.

غدا 8 مارس، كيصادف اليوم العالمي للمرأة، وهاد اليوم طبعا ماشي مجرد يوم..وانما ذكرى ديال واحد الانتفاضة لم يرى العالم مثيلا لها..ذكرى ديال واحد الانتفاضة وواحد القوة ماشي ذكورية كيف ولفنا شحال هادي وإنما انتفاضة نسوية..انتفاضة بصوت المرأة..ديك المرأة لي كانت محگورة ومستلبة الهوية من طرف المجتمعات الذكورية...تاريخ آخر بصوت وقلم نسوي..

اليوم العالم ولا كيحتافل كل يوم 8 مارس من كل عام باليوم العالمي للمرأة..ربما غادي تساؤل مع راسك علاش بالضبط كيحتافلو نهار 8 مارس وعلاش اختارو هاد النهار بالضبط...هنا غانرجعو للجملة لي بديت بيها الموضوع "كل حركة عندها نتيجة"....فعام 1857 بالضبط نهار 8 مارس خرجات 15 ألف امرأة لي كانو خدامات فقطاع النسيج والخياطة خرجو للشارع ونظمو مظاهرات احتلو بيها شوارع مدينة نيويورك الأمريكية باش يطالبو بمجموعة من المطالب...

من بين هاد المطالب طالبو هاد النساء بتقليص مدة العمل حيت كانو كيخدمو 16 ساعة وهوما كيطالبو ب10 سوايع...كان واحد التمييز فالصالير واقصاء للمرأة علاش ؟ الراجل كان كيتخلص كثر من المرأة هادشي ماشي معقول لذلك طالبو هاد النساء بالمساواة بين الجنسين فالصالير...هنا طبعا السلطات الامريكية ماغديش يصبرو وغايدخلو فهاد النساء بالقرطاس والزرواطة طولا وعرضا وقتلو فيهم 129 مراا عاملة زائد شدو الآلاف منهم غبروهوم...علاش ؟...حيت المرأة رفعات صوتها على واحد النظام ذكوري...

كانو هاد المظاهرات ضربة للنظام الامريكي الشيء لي خلاهم يدخلو فالخط ويناقشو قضية المرأة...ومن بعد فعام 1908 بالضبط فيوم 8 مارس ناضو النساء عوتاني وخرجو فمظاهرات بالآلاف ديال النساء وخرجو للشارع ولكن هاد المرة بأسلوب العقلاء خرجو هازين الورود والخبز وزادو طالبو بمطالب خرى لي هي التقليص من مدة العمل ووقف تشغيل الاطفال ومنح النساء حق التصويت والاقتراع تحت عنوان الحركة النسوية "الخبز والورود" ومن هنا غاتبدى الشرارة ديال المطالبة بحقوق المرأة فجميع المجالات والمطالبة بالمساواة وعدم الاقصاء...

من بعد عام بالضبط ف 1909 غادة تجاوز الحركة النسوية الحدود الامريكية وغاتوصل لأوروبا بالضبط فنهار 8 مارس 1909 ناضو النساء فأوروبا وخرجو حتى هوما تفاعلا مع الامريكيات ومن اجل توحيد الحركة النسوية فالعالم كامل ماشي غير فميريكان وأوروبا...وهنا عزيزي القارء عزيزتي القارئة استاجب الحزب الاشتراكي الامريكي لصوت النساء واعطاها حق المطالبة المشروعة بحقوقها سوا فالخدمة وسوا فالحياة المدنية ومن بعد عام ف1910 غادي يتنظم اجتماع ف"كوبنهاغن" وتجمعو فيه مئات النساء من 17 دولة تجمعو فيه اقوى النساء فالعالم بما فيهم المناضلات والبرلمانيات وغيرهم باش يحددو واحد اليوم عالمي للدفاع عن حقوق المرأة بصفة كاملة بما في ذلك المساواة والترشح فالانتخابات للمناصب السياسية وغيرها...

من بعد تم الاتفاق على 8 مارس من كل عام وفنفس العام خرجو تاني اكثر من مليون امرأة كيطالبو بحقوق المرأة...وفعام 1914 غاتشعل الحرب العالمية اللولة وغايخرجو النساء كمعارضة على الحرب ف أوروبا وخرجو فالشوارع كيطالبو بتحقيق السلام وايقاف الحرب الشيء لي غادي يتسبب فموت 2 المليون ديال النساء فروسيا بسباب الحرب وهنا غايخرجو الروسيات ينتاشرو فالشوارع ويتظاهرو من اجل السلام ومن اجل حقوق المرأة الروسية وهنا غايتدخل النظام القيصر وغايقمعهم ولكن ماغديش يقدر يحبسهم حيث الانتفاضة تجاوزات الحدود من ميريكان لأوروبا كاملة وروسيا وناضو نساء اوروبا وميريكان كيتضامنو مع الروسيات وهنا النظام القيصري ماعليه غير يستاجب للانتفاضة النسوية وبالثالي وافق وعطى للمرأة حقوقها فالانتخابات والتصويت والترشح...

ومن تما ولا يوم 8 مارس كيوم عالمي للمرأة فالعالم وكيتعتابر هاد اليوم كتخليد للانتفاضة النسوية والتضامن بين نساء العالم وبين الشعوب من اجل السلم والديمقراطية وحقوق الانسان...وفعام 1976 خرجات اتفاقية من عند الامم المتحدة مفادها القضاء على جميع اشكال التمييز صد المرأة وفعام 1977 تم اختيار يوم 8 مارس من كل عام كيوم عالمي لحقوق المرأة والسلام....وهادشي كامل بسباب الضغط والانتفاضة ديال الحركات النسائية...وبمناسبة يوم 8 مارس أقول لكل النساء المغربيات يوما عالميا مجيدا....هادشي لي كاين نتشاوفو مرة خرى...بيس.

بقلــم:الـﺴـــــــﺎﻋــــﺮ
Gerard Lopez

#شارلي_بالدارجة