"لغـــــز اختفــــاء المـــونـــاليــــزا"

"لغـــــز  اختفــــاء المـــونـــاليــــزا"





حنا كنعرفو ان الحروب والازمات والثورات هي أكثر الأشياء لي كتزعزع الحكومات...ولكن آش بان ليك إيلا قلت ليك بلي واحد اللوحة توضرات وبسبابها تسدو الحدود وناضت الروينة فواحد البلاد..تيقني ؟ ماغديش تيقني...نمشيو للموضوع.

كلنا كنعرفو "الموناليزا" أشهر لوحة فالعالم ديال ديك السيدة الجيوكيندا لي عندها واحد الإبتسامة غامضة لي رسمها الرسام الإيطالي "ليوناردو دافينشي"...هاد "ليوناردو" كان واحد التاجر طالياني ف"فلورنسا" سميتو "فرانشيسكو دي جوكوندو" ناض طلب من "ليوناردو" باش يرسم ليه مرتو لي سميتها "ليزا جيراردي" حيت ولدات ليه 5 ديال دراري زعما تقديرا لها...

"ليوناردو" 4 سنين وهو خدام على هاد اللوحة ولكن فاللخر معطاهاش لداك الراجل ومرتو لأسباب مجهولة وبقات هاد اللوحة كتلاح من قنت لقنت ومن مدينة لمدينة حتى سالات بيها فالبلاط ديال ملك فرنسا "فرونسوا الأول" شدها هاد الملك وحطها فواحد القصر سميتو "فونتينبلو" وملي جا الملك "لويس الرابع عشر" حولها لقصر "فرساي" ومن بعد الثورة الفرنسية تحولات من داك القصر لواحد المتحف سميتو "متحف اللوفر" وبقات تما...

بقات "الموناليزا" فداك المتحف تال 1911 غادي يفيقو الفرنسيين على واحد الخبر مكيفرحش لي هو اختفاء لوحة "الموناليزا" من المتحف...أواه أغنى وأشهر لوحة فالعالم توضرات ناري لا...فداك النهار تدخلات الحكومة وجرات على كاع الخدامة لي فالمتحف ودارو تحقيق مع آلاف الخدامة والموظفين  وشدو منهوم بزاف بل اكثر من ذلك ناضت الحكومة سدات الحدود الفرنسية...أواااه هادشي كامل على قبل لوحة ؟ العجب...

آييه أسي الناس لي كيعتارفو بالفن وعارفين قيمتو قالك هههه، الفرنسيين قلبو حتى عياااو والو مالقاوهاش لقاو غير الكاضر ديالها ومن بعد 3 سنين وصلات الخبار للحكومة الفرنسية من واحد السيد سميتو "جاليري أوفيزي" من طاليان وقال ليهم راه شدينا واحد السيد سميتو "فينتشنزو بيروجي" وهاد السيد حصلناه باغي يبيع لوحة الموناليزا لي تشفرات ليكم...

أوااه... ناضو السلطات وتحققو من اللوحة ولقاوها أصلية وملي جاو يحققو مع داك السيد لقاوه ديجا كان جايب دويرة من "متحف اللوفر" لي كانت فيه اللوحة وبلي كان كيتسنى المتحف حتى تسد وهز اللوحة وعلق لطاليان ولكن هاد خونا طلع مريگل قاليهوم انا ماشفرتهاش انما رجعت الموناليزا لبلادها الأصلي...ياك "ليوناردو دافنشي" لي رسمها إيطالي ؟ ياك ديك السيدة لي مرسومة فاللوحة إيطالية ؟ إذا راه حنا ماليها...اللوحة خصها تبقى فبلادها ونتوما ماعندكومش فيها الحق...

هاد الهضرة شعلات العافية فالإيطاليين وناضو تاهوما معاه ونوضو الروبلة ومن بعد تدخلو الحكومات وفكو هاد الصداع ودارو اللوحة فواحد الجدار فواحد البلاصة خاصة بيها وسدو عليها بزجاج مضاد للرصاص يعني ولات ديال العالم كامل يمكن لأي واحد يجي يشوفها...طبعا "فينتشينزو" لي منوض هاد الصداع ماغديش يفلت منها واخا اعتابروه الايطاليين كبطل قومي حكمو عليه بالحبس لمدة عام ودوز منها 7 شهور وخرج فحالاتو ولكن كيرجع ليه الفضل فتخليص لوحة الموناليزا من سلطة الفرنسيين....هادشي لي كاين نتشاوفو مرة خرى..بيس.

بقلــم: الـﺴـــــــﺎﻋــــﺮ
Gerard Lopez

#شارلي_بالدارجة