"عيــــد الحـــــب" ذكـــرى إستشهـــــاد القـــديــس فــالنتـــايــن.

"عيــــد الحـــــب"
ذكـــرى إستشهـــــاد القـــديــس فــالنتـــايــن.

هو زوين يكون عندنا واحد النهار فالعام نتفكرو فيه حبابنا والناس لي كنبغيو والناس لي كيبغيونا..سوا واليدينا سوا صحابنا..ولكن حيت حنا عندنا أعياد وايامنا كلها صلة رحم وحب مافيها باس ايلا تخلصنا من زي التقليد باش مانكونوش ضحايا التقليد الأعمى للغرب...نمشيو للموضوع.

عيد الحب أو عيد العشاق لي فالأصل معروف ب"عيد الفالنتاين" ..هاد العيد هو واحد الإحتفال مسيحي سطر عليها كيحتافلو فيه الناس المسيحيين نهار 14 فبراير حسب الكنيسة الغربية وكيحتافلو بيه نهار 6 ف يوليوز فالكنيسة الشرقية فكل عام، فهاد العيد كيعبرو الناس على الحب ديالهم لناس خرين وكيسيفطو فيه الرسائل والورود والازهار للعشاق ديالهم تعبيرا عن الحب ديالهم بيناتهم....

عيد الحب كيحتافلو بيه الناس كذكرى على وفاة القديس "فالنتاين"...شكوناهوا هاد "فالنتاين" وكيفاش البلان ديالو ؟...غادي نرجع بيكم للقرن الثالث الميلادي فالإمبراطورية الرومانية...ديك الساعة كانت الحرب بين الإمبراطورية الرومانية وشي وحدين سميتهم"القوط"...فهاد الحرب غادة تاكل الإمبراطورية الرومانية لعصى حيت فنفس الوقت كان منتاشر مرض الطاعون وقتل شي 5 آلاف ديال بنادم ومن بينهم الجنود الرومانيين هادشي تسبب فالتراجع ديال الإمبراطورية الرومانية فالحرب...

ديك الساعة كان حاكم الإمبراطور "كلوديوس" وكان خصو جنود هنا غتوصلو واحد الكذبة بلي افضل المقاتلين هوما دوك لي مامزوجينش (عزاب) حيت دوك لي مزوجين كيتكاسلو فنظرو والزواج كيلاهيهوم على المعارك...هنا الحاجة ديالو للجنود باش يربح الحرب ضد "القوط" خلاتو يمنع الزواج على الجنود وفنفس الوقت قمع بنادم حيت هاد القرار جبد عليه السخط ديال الناس فالإمبراطورية وفنفس الوقت شد دوك المسيحيين وفرض عليهم يعبدو الآلهة الرومانية وأي واحد وقف فوجهو كيقتلو...كان كيشد المسيحيين كيلوحهوم فالما طايب كيبان لك بنادم دايب وكان كيقطع ليهم لسانهم لدرجة دمر التاريخ ديال المسيحية فالإمبراطورية الرومانية...

هاد القرار ديال منع الزواج جبد عليه السخط ديال بنادم وغاينوض واحد السيد  قديس سميتو "فالنتاين" خدام فالكنيسة وغايوقف فوجه الإمبراطور "كلوديوس" على هاد القرار وعارضو ودافع على الزواج وقاليه هذا ماشي هو الحل لي غادي تربح بيه الحرب ضد "القوط"...وفنفس الوقت وقف ضد المجازر لي رتاكبها ضد المسيحيين...

هنا القديس "فالنتاين" ملي ماتسوقش ليه الإمبراطور "كلوديوس" غاينوض غايدير لي فراسو وغيبدى يزوج الناس سرااا وفالخفاء فالكنيسة وهكا كيكون تجاوز الحدود ديالو وهرس القرار ديال الإمبراطور "كلوديوس"...من بعدما زوج القديس"فالنتاين" بزاف ديال الناس سرا..خبارو غاتوصل للإمبراطور "كلوديوس" وغادي يحكم عليه بالإعدام وشدوه فالحبس بيما وصل موعد الإعدام..

هاد القديس "فالنتاين" كان كيبغي واحد السيدة بنت واحد الحارس فالحبس لي مشدود فيه...موهيم ناض كتب ليها رسالة كيعبر فيها على الحب ديالو ليها..هنا غاتوصل لهضرة للحارس ومن الحارس للإمبراطور هادشي حقدهوم وغايشدوه غايعدبوه مزياان ومن بعد قطعو ليه راسو فنهار 14 فبراير عام 269 فروما...(كاينة ايسطوار خرى كتقول انه زنى مع بنت الامبراطور لذلك عدموه) وفعام 496 غاينوض البابا "غلاسيون" وغايعلن على نهار 14 فبراير كعيد وذكرى للقديس "فالنتاين" فكل عام وسماوه ب"يوم القديس فالنتاين"...

ومن تما بداو الغرب المسيحيين كيحتافلو بهاد النهار فكل عام تخليذا للجهود والتضحية ديال القديس "فالنتاين" لي وقف فوجه الإمبراطور الروماني ودافع على الحب ودافع على المسيحيين لي كانو محكورين ديك الساعة...هادي هي ليسطوار ديال عيد الحب لي كيحتافلو بيه المسيحيين كل 14 فبراير فكل عام....وانتوما المسلمين مالكم لصقة ؟ لي شفتوها داروها تديروها تانتوما ؟

شفت بزاف ديال الشيوخ المسلمين كيحرمو هاد الإحتفال وكيعارضوه بدعوة أنه ديال الغرب وكيخص الغرب بوحدهم وماشي ديال المسلمين...أنا ماغديش نتافق معاهم وماغديش نعارضهم أنا فنظري الناس لي فشكل وقلوبهم صافية راه ايامهم كلها حب بحال 14 بحال 16 بحال السبت بحال تنين ممحتاجينش يتسناو 14 فبراير من كل عام عاد يعبرو على الحب ديالهم...الحب معندوش زمن محدد ومعندوش نهار محدد...الحب مطلق بحال الأوكسجين فيما مشيتي ووقتما مشيتي تلقاه...خليكوم من التقليد الأعمى وماتخليوش الريح لي جات تديكوم....هادشي لي كاين هادي هي ليسطوار ديال عيد الحب...نتشاوفو فشي موضوع خر...بيس.

بقلــم: الـﺴـــــــﺎﻋــــﺮ
Gerard Lopez

#شارلي_بالدارجة