"الإستمطـــــــــار الصنــــــــاعـــي"
Industrial Pollution.
كلنا عارفين شنو كيوقع فشي بلاد ماكتصبش فيها الشتاا، البلاد كادخل فالجفاف والمعيشة كاتغلا والناس مكتلقى ماتاكل شوية بشوية الناس كاتولي عندهم المجاعة والقحط ومكيلقاوش باش غيواجهو هاد البلان خاصة ان الشتاا هي كلشي ايلا ماتصباتش الشتااا مكاين والو..نمشيو للموضوع..
مهما بلغت البشرية من تقدم ماخصناش ننساو دور العلم فحياتنا على مر العصور حيت العلم هو الحل ديال كل مشكلة والملجأ ديال كل تائه وهو لاباز ديال كاع هادشي لي كتشوفو دابا،كاع هادشي مبني على أساس العلم، ندخلو للموضوع، مع التوالي ديال الجفاف فبزاف ديال الدول وتأخر الأمطار العلماء تدخلو باش يحلو لينا هاد المشكلة وتوصلو لواحد الطريقة لي غانقدرو نطيحو بيها الشتاا فأي منطقة بغينا بلا منبقاو نتسناو فيها تصب على خاطرها...
هاد الإمكانية سميتها "الإستمطار الصناعي" بانت أول مرة فعام 1947 بالضبط فأستراليا من خلال منظمة "الكومنولث للأبحاث العلمية" وكتعتابر أستراليا اول دولة دارت هاد الاستمطار الصناعي ومن بعد تطورات هاد العملية وخدمات بيها ميريكان حتى هي ومع المدة بداو كاع الدول كيخدمو بيها حتى وصل العدد لأكثر من 40 دولة...بهاد الإمكانية غادي نستمطرو السحب صناعيا ونشحنوها باش تعطينا الشتا ديريكت بلا منبقاو نتسناو شهور عاد تصب، هاد الإمكانية كيخدمو بيها بزاف ديال الدول العربية بحال السعودية والأردن والمغرب السعيد، كيفاش كيديرو هاد الإستمطار الصناعي ؟..
هاد الاستمطار الهدف منو هو نسرعو العملية ديال تساقط الامطار ولا نزيدو فالنسبة ديال الأمطار من خلال بعض المواد الكيماوية وبعض الآلات الصناعية ومن خلال هاد العملية يمكن لينا نتحكمو حتى فالجو ونحسنوه ونطيحو الشتا حتى فالمناطق لي كتعاني من القحط والجفاف وارتفاع درجات الحرارة ونعمرو السدود بالماا ونزيدو فالكثافة ديال الغطاء النباتي...الى آخره..كيفاش ؟
ايلا بغينا نديرو هاد الاستمطار الصناعي خصنا نحقنو السحب ببعض المواد الكيماوية بحال "يوديد الفضة" و"ثاني أكسيد الكربون المجمد" و"كلوريدات الصوديوم والكالسيوم والبوتاسيوم" والاملاح الشائعة وشي مركبات كيماوية اخرى باش نزيدو حتى فالكثافة ديال السحب، فاش كنحقنو هاد السحب بهاد المواد الكيماوية كيوقع واحد التفاعل بين هاد المركبات داخل السحب وكتحول دوك القطرات ديال الما لي فالسحب لبلورات ثلجية ثقيلة وهاد البلورات فاش كاطيح كاتهبط بواحد السرعة ثقيلة وكتعرض لدرجات الحرارة فالسما وكتحول لقطرات مائية وبالتالي كتهبط على شكل أمطار..كيفاش كنحقنو هاد السحب بهاد المواد الكيماوية ؟..
الوسائل والآليات كثيرة على حساب كل دولة يمكن لينا نستعملو الطائرات فعملية الرش والحقن ويمكن لينا نستعملو صواريخ وقدائق كتكون محملة بالمواد الكيماوية وكيطلقوها جيهة السحب على شكل الألعاب النارية وكيستعملو بعض الموالدات الأرضية لي غادة تولد لينا "بخار الماء" وكيستاعنو بالتيارات الهوائية لي غادة تهز لينا هاد بخار الماء وطلعو للسما فين كيتجمعو السحب الركامية...هاد القضية مزيانة من واحد الناحية ولكن من ناحية خرى راه مشكل كبير حيت كاينة احتمالات تأثر هاد المواد الكيماوية فالصحة ديال الانسان والحيوان والبيئة حيت اغلب هاد المواد سامة بحال "يوديد الفضة" ويقدر تخلط هاد المادة مع المياه ديال الشتا وتسرب فالمحاصيل الزراعية ولا المياه السطحية لي كنشربوها هادشي غيأثر سلبا على حياتنا ويقدر يتسبب لينا فشي حوايج لا تبشر بالخير....واش هاد الاستمطار حلال ولا حرام ؟
بزاف ديال علماء الدين كيحرمو هاد الإستمطار وكيعتابروه مخالف للشريعة الإسلامية لجوج ديال العوامل، العامل اللول هو ان هاد الاستمطار مكيدارش بطريقة عادلة يعني كيدار غير فشي مناطق مثلا يقدر يدار فكازا ويستافدو منو الناس ديال كازا ويبقاو الناس ديال المناطق لخرى بلاش ومن جهة ثانية هادشي كيخالف إرادة الله حيت هكا كنبززو على السحب والغيوم باش يعطيونا الشتا صحة كنوع من معارضة القدر والتدخل في شؤون الله ومع ذلك السعودية اول دولة مستفيدة من هاد الإستمطار الصناعي..على العموم هادشي لي كاين حاولت نعطيكم فكرة على هاد الموضوع نتمنى يكون فالمستوى وكالعادة نتشاوفو فشي بلان خر...السلام عليكم
بقلــم: الـﺴـــــــﺎﻋــــﺮ
Gerard Lopez
Commentaires