يـــوميــــــات قـــــاتــــل اقتصــــــــادي" فضــــح مخططــــــــات أمــــريكــا. Economic Hit Man.

قـــــاتــــل اقتصــــــــادي"  فضــــح مخططــــــــات أمــــريكــا.
Economic Hit Man.

بزاف ديال لحوايج مامفهومينش فهاد العالم، بزاف ديال الاغتيالات بزاف ديال الغميق بزاف ديال الحروب كنسولو ريوسنا على السبب فهادشي كنلقاو ريوسنا فعلامة استفهام وراها الخاوي حيت حتى واحد معارف اش كيوقع فالكواليس وخلف الستار...هادشي لي غانشوفو فهاد الكتاب...تبعو معايا..

كيف قلت ليكم بزاف ديال لحوايج كيوقعو ورا الستار وبزاف ديال البلانات كيوقعو بدون مبرر كتفكر حتى تعيا وتقول الله اعلم وكتساليها بهادي مؤامرة وتسكت، موهيم نعرفكم على واحد الكتاب بعنوان "يوميات قاتل اقتصادي" هاد الكتاب من نوع اخر علاش ؟ حيت هاد الكتاب ماشي ديال الحب والرومنسية وماشي ديال الأدب والفلسفة وماجاورهما، هاد الكتاب هو الجواب ديال دوك الأسئلة لي كايضورو ليك فراسك، هاد الكتاب هو لي كيفرش مخططات ماما أمريكا والغميق ديالها على بلدان العالم التالث والنهب والاستغلال ديالها للدول النامية من بعدما كتغرقها بالديون..

هاد الكتاب كاتبو واحد السيد ميريكاني سميتو "جون بيركنز" كاتب هاد الكتاب على شكل ديال مذكرات ديالو وكيوصف فيه الغميق والاستغلال ديال ميريكان وكيبين فيه كيفاش كانت ميريكان كتغمق على العباد بطرق ذكية...هاد "جون بيركنز" كان هو كبير الاقتصاديين فشركة "مين" الامريكية العابرة للقارات وكانت الوظيفة ديالو هي القتل الاقتصادي يعني كيتخلص مقابل الخداع والكذوب على الناس والابتزاز وابتزاز رؤساء الدول النامية وهكا كايحول هو والقتلة الاقتصاديين لخرين الفلوس من الابناك الدولية والوكالات والمنظمات للشركات الكبار والعائلات االفاحشة  الثراء على حساب البلان ومن غير هادشي كيزورو الانتخابات ويرشيو الوزراء وبعض المرات كيبتزو بنادم ويقتلو ويغرو بنادم حتى يطيحوه فشبكة ويسوسوه...الخ

"جون بيركنز" كيبين لينا المخططات الامبريالية لي كتنهجها ميريكان باش تسيطر على العالم التالث وهادشي شارك فيه هو شخصيا وعطانا بزاف ديال الامثلة على التخوشيف ديال ميريكان فبزاف ديال البلانات بحال الإطاحة بالرئيس الإيراني "محمد مصدق" من طرف ضابط الاستخبارات الامريكية "كيرمت روزفلت" فعام 1951 وعوضوه بالشاه "محمد رضى بهلوي" كإمبراطور لإيران...علاش صفاتها ميريكان لمحمد مصدق وعوضاتو بواحد خر ؟ ببساطة محمد مصدق كان رئيس ديمقراطي وكان قطع البترول على الإمبرياليين الغرب وهادشي خلا ميريكان تفطر بيه قبل مايتعشى بيها...

ونفس الشيء دارتو ميريكان مع رئيس بنما "عمر توريجس" وصفاتها ليه حيت كان كيطالب باستعادة قناة "بنما" لي استعمراتها ميريكان وناضو صفاوها ليه..."جون بيركنز" كيبين لينا كيفاش كانت ميريكان كتعامل مع الأعداء ديالها واي واحد فكر يخرج على طريق القطيع، ومن غير هادشي كانت ميريكان كتقتل حتى دوك القتلة الاقتصاديين ملي كتسالي منهم غراضها وملي كتحس بيهم بداو يفيقو من الگلبة من التجنيد الاقتصادي..

القتلة الاقتصاديين بحال "جون بيركنز" كانت كتجندهم ميريكان مزيان ومن بعد كيمشيو هاد القتلة الاقتصاديين يقنعو الزعماء ديال الدول باش ياخدو قروض كبار من البنك الدولي وصناديق النقد والبنوك الامريكية باش يمولو مشاريعهم...كيفاش ؟ دابا ملي كيقبل شي رئيس ديال شي دولة بهاد العرض كتعطيه ميريكان قروض وديون كبار وهكا كتحكم فيه ميريكان وكتبقى تورك عليه دقة دقة وغا بالفن حتى كتخنقو وبالثالي مكيقدرش يسد الديون لميريكان وبالثالي كاتدخل ميريكان وتشد كولشي فديك البلاد وكتستغل ديك السبة ديال مارديتيش ليا الديون ديالي غادي ناخد لك البلاد..

وفي حالة ماقدروش هاد القتلة الاقتصاديين يقنعو هاد الرئيس باش ياخد قروض من ميريكان، كاتخدم ميريكان الخطة الثانية لي هوما مايسمى ب"الواويات" الدور ديال هاد "الواويات" هو يقتلو داك الرئيس في حالة مبغاش يشد قروض وكيصفيوها ليه من خلال انقلاب او اغتيال ( كيما دارو مع رئيس إيران محمد مصدق ورئيس بنما عمر توريجس) وفي حالة ماقدروش هاد "الواويات" يقتلو هاد الرئيس هنا ميريكان كتطبق الخطة الثالثة وكتدخل بالجيش ديالها ديريكت وكتستعمر ديك البلاد صحة كيما دارو مع "صدام حسين" فالعراق والرئيس "نوريفا" ف بنما لي دخلات ليها ميريكان بالجيش وشرشماتها بدون مبرر...نرجعو تاريخ لور، علاش ميريكان هجمات على العراق فعوض ماتهجم على تنظيم القاعدة فأفغانستان ؟ علاش "جورج بوش" حط عينو على العراق بلاصة مايقضي على الإرهاب لي كان خالقو تنظيم القاعدة وكان منوض البلبالة ؟ ببساطة حيت المصالح قبل كل شيء، ميريكان كان الهدف ديالها هو تعمر جيوبها بتأمين النفط وتبني الاقتصاد ديالها حسن ليها من محاربة الارهاب لي ماعندها فيه حتى رباح ولو ان "صدام" قبل بالعرض كان غيبقى عايش لحد الآن كيما دارو معا السواعدة ولكن "صدام" طبعا رفض وطلق ليهم الصوارخ والنتيجة راكم عارفينها وهادشي وبهاد المخططات احتلات ميريكان بلدان العالم التالث وغرقاتها بالديون ودارت فيها مابغات...

فاش كنتساءلو على شي حرب ولا شي بلان كنقولو باستهزاء وسخرية هادي مؤامرة وفعلا راها مؤامرة كيديروها هاد الناس خلف الستار ويخيطو ويفصلو كيما بغاو وكيستغلو الإعلام ويعطيونا مبررات زائفة وهادشي راه كنشوفوه حاليا فسوريا وبلاد الشام هادشي كامل وهاد الحروب وهاد التناظيم الارهابية كلها قوالب وسياسة ممزوجة بالدين، هادشي صرح بيه واحد منهم، صرح بيه واحد تسبب فالدمار لبزاف ديال الشعوب من خلال إغراق الدول بالديون لي كتستغلها ميريكان باش تدخل وتحط رجليها فكولشي....موهيم هادشي لي كاين نتمنى يكون الموضوع فالمستوى وكالعادة نتشاوفو فشي موضوع خر.

بقلــم: الـﺴـــــــﺎﻋــــﺮ
Gerard Lopez