"الإكتئــــــــــــاب"
كنسمعو بالإكتئاب وفينا لي كيعاني منو ولكن عمرنا سولنا على السباب فهاد الإكتئاب وكيفاش نداواو منو..موهيم نمشيو للموضوع..
"الإكتئـــــــــاب" هو واحد الحالة نفسية كيتسبب فيها واحد الإضطراب فالعقل ديال بنادم، هاد الحالة النفسية كاتخلي بنادم يحس بالكعية والسلبية واحد المدة طويلة وكاتقتل فيه داك الحماس والمبالاة وتخليه بلا گانة وميبقاش مسوق وتخليه ديما متشاؤم وديما طايح عليه ضايم والاحساس بالذنب وتخليه يفقد الأمل فالحياة وميبقاش عندو هذف فحياتو يعني غا عايش...هاد الإضطراب فيه درجات إما حاد و إما منخافض الشيء لي كيتسبب فتغيير المزاج وهادشي كيأثر سلبا على الأفكار والمشاعر والسلوكات ديال بنادم ويبدى يحس بالكآبة والقلق والفراغ والرغبة فالبكاء...وكايخلي بنادم معكاز ومعندوش الگانة على الخدمة وعدم الاهتمام وفقدان الشهية بالاضافة لمشاكل فالتركيز وهادشي كيخلي بنادم يضرب راسو ويخليه ينتاحر....
شناهي الأعراض ديال هاد الإكتئاب ؟ من الاعراض ديالو فاش كتنعس بزاف وكتحس براسك عيان وعندك مشاكل فالهضم والاوجاع...وهاد الكآبة ماشي بالضرورة تكون بسباب الاضطراب النفسي، لا لا تقدر تكون بسباب شي علاج ولا شي عملية طبية درتيها...الخ، شناهي الأسباب ديال هاد الاكتئاب ؟ الاسباب كثيرة ومختالفة من بينها الظروف الاجتماعية والتوتر والأحذاث القاسية لي عشتيها فحياتك ودزتي بيها مثلا مات لك شي حد عزيز عليك ولا طلقو واليديك...الخ والحرمان العاطفي والمادي وفقدان الحب مثلا تفارقتي مع صحيبتك ولا تفارقتي مع صحيبك والفشل والإحباط والكبت والقلق والاحساس بالذنب والوحدة والعنوسة والتغيرات لي كتعيشها فحياتك والمشاكل المادية ومشاكل الخدمة والمشاكل فالعلاقات ديالك مع ناس...الى آخره..وكاينين بعض الادوية كيتسببو فالكآبة بحال الدوا ديال التهاب الكبد (C) والادوية لي كيستعملوها فعلاج ضغط الدم (بيتا) (ريزربين)..
واش يمكن لينا نداواو من هاد الإكتئاب ؟ آه ولكن العلاج كيتطلب وقت وخصك دير واحد المجهود باش داوا، بعض الدراسات كتقول بالي الضحكة "ابتسامة" كتأثر على الشرايين لي كتوصل الدم للمخ الشيء لي كايخليك تحس بالهدوء والفرحة، بالإضافة للصداقة حيت فاش كايكونو ضايرين بيك صحاب كتكون بعيد على الإكتئاب وكتخرج من ديك دوامة الكآبة، ماشي كاع صحاب لا لا الصحاب لي كيعانيو حتى هوما من الإكتئاب حيت لخرين غايطلعوها عليك، هادشي كيخليك تخرج من ديك الوحدة والعزلة..من غير هادشي كاين علاج "الاستشارة النفسية" تشوف شي واحد يقدر يتصنت ليك وتعاود ليه كولشي ويتفهم الوضع ديالك ويفهمك ويحس بيك ويعاونك ويشجعك باش تغلب على هاد الإضطراب وتخرج للحياة الاجتماعية...
واش كاين شي دوا لهاد الإكتئاب ؟ آه كاينة أدوية مضادة للإكتئاب ولكن المفعول ديالها كيسالي دغيا وكتسبب فأمراض جانبية وامراض صحية خطيرة لذلك حسن تلعب على العلاج النفسي حسن، وكاينة امكانية خرى ديال العلاج سميتها "العلاج بالضوء" أو التعرض للضوء، فهاد العلاج كاتجلس قدام واحد المربع فيه الضو "اشعة" وكاتبقى حال عينيك ف الأشعة لمدة 15 دقيقة ومع المدة كتحس بتحسن لمدة سيمانة ولا جوج وكاين ماحسن من هادشي المداومة على قراءة القرآن والصلاة خص غير بنادم يزعم وفالنهاية الله يشافي كل مريض هادشي لي كاين نتمنى يكون الموضوع فالمستوى نتشاوفو مرة خرى طهلاو.
بقلــم: الـﺴـــــــﺎﻋــــﺮ
Commentaires