"الإحتفـــــــال بالمــــــــوتــــى" "Celebration of the Dead"

"الإحتفـــــــال بالمــــــــوتــــى"

 

 

حنا كنعرفو ملي كيموت شي حد كندفنوه ونصليو عليه من تما مكنبقاوش نسولو عليه، اش بان ليك ايلا قلت ليك كاينين شي ناس كيجبدو الموتى من القبر ويدوشو ليهم ويلبسوهم ويتصورو معاهم ؟ ماتيقتيش ياك ؟..نمشيو للموضوع.

"الإحتفال بالأموات"..ايلا رجعنا شوية تاريخ لور غنلقاو كل شعب وكل حضارة عندها طقوس ديالها فالتعامل مع الموتى، اما كيحرقهم اما كيعطيهم للحيوانات ياكلوهم اما كيدفنوهم...الى آخره، مثلا الصين كانو كيديرو الموتى فصنادق ويعلقوهم فجبال، وفالهند كيحرقو الجثة ديال الميت، كانت عندهم واحد الطقوس قديمة كيسميوها عادة "الساتي" كيفاش لبلان ديال هاد العادة ؟ مثلا شي مرا مات ليها راجلها كيشدو الجثة ديالو ويشعلو فيها العافية وكيشعلو العافية حتى فمرتو واخا حية يعني المرا عاشت مع راجلها وتقاسمات معاه الحلوة والمرة نهار يموت خصها تموت معاه..وكاينين طقوس خرين مثلا عند "الفايكينغ" فاش كيموت شي حد كيشدوه كيديروه ف فلوكة (قارب) ويشعلو فيه العافية ويدفعوه فالبحر وكيشدو مرتو ويقتلوها ومن بعد يشعلو فيها العافية حتى هي..

من طقوس الفراعتة كانو الكهنة كيشدو الموتى ويحنطوهوم..و فبلاد فارس الزرادشتيين كيشدو الموتى كيحطوهم فشي سطوحة باش تجي النسور والطيور ياكلوهم والبوذييت حتى هوما نفس الشيء كيشدو الجثث كيقطعوهم ويلوحوهم للحيوانات..وكانو شي قبائل ف "بابوا غينيا" كيديرو شي طقوس مكيتقبلهاش العقل، كانو كيشدو الميت كيقطعوه طراف طراف ويطيبوه ويتجمعو العائلة والاصدقاء ديالو فقط ومرتو وياكلوه وكيبقى المخ كيعطيوه لمرتو ديرو كاسكروط..

فإيطاليا كانو شي مقابر بحال مقبرة "الكابتشين" كيجبدو الموتى ويعلقوهم فالحيوط باش يشوفوهوم السياح بحال شي لوحة فنية...فالعصر الفيكتوري كانو الناس ايلا مات ليهم شي حد كيقطعو ليه شعرو ويصنعو منو گورميطات وأساور وكيحيدو ليه سنانو ويصايبو منهم خواتم وقلادات وهادشي زعما كتخليد للذكرى ديالو..ومن اغرب الطقوس ف"بوليفيا" كان عندهم واحد اليوم ديال الاحتفال بالموتى كايسميوه "نياتيتاس"كانو كل عام كيجبدو الموتى من القبر وكيزينوهم بالورود ويديرو الگارو فالفم ديال الميت زعما كيحتافل معاهم..

نمشيو للمكسيك، فالمكسيك كانو كيحتافلو بالموتى فاليومين اللولى من شهر 11 من كل عام كان عندهم واحد الاعتقاد بلي الروح ديال دراري صغار كتخرج من القبر نهار 1 ف شهر 11 اما الروح ديال البالغين كتخرج فالنهار الثاني ف شهر 11، فهاد اليومين كيمشيو عائلات الموتى للمقابر وكايديو معاهم الماكلة والمزيكة وكيزينو القبور ويبداو يغنيو ويشطحو وكيعطيو "القرابين" للموتى كيفاش كيعطيو هاد القرابين ؟ كيجيبو الماكلة والشراب لي كانو عزاز على داك الميت ويحطوها مثلا واحد كانت عزيزة عليه رفيسة كيجيبو رفيسة فداك نهار...الخ هاد الطقوس كانت عند حضارة "المايا" فأمريكا الجنوبية..

ولكن أغرب الاحتفالات هي لي كاينة عند قرية "توراجا" فأندنوسيا، كانت عندهم شي طقوس سميتها "ماينين" وكتعني (احتفال تنظيف الجثث) الناس ديال هاد القرية كان عندهم واحد الشهر فالعام كيجبدو فيه الموتى من القبر ويغسلوهوم ويلبسوهوم حوايج جداد وكيبداو يضورو بيهم فالدروبة وكان عندهم واحد الاعتقاد فشكال كيقولو بلي روح الميت خصها تدفن فالقرية لي تولد فيها يعني ايلا شي فلان الأصل ديالو من مراكش مثلا ومات ف طاليان خصو يتدفن فمراكش، هاد الطقوس كاملة وهادشي كامل هو بمثابة تخليد ذكرى الموتى وفالإسلام كندفنو بنادم ونصليو عليه وناكلو الكسكسو وجمع وطوي...حاولت نعطيكم فكرة على طقوس الاحتفال والتعامل مع الموتى، هادشي لي كاين تقبلو منا المجهود ونتلاقاو فشي موضوع خر.

بقلــم: الـﺴـــــــﺎﻋــــﺮ