"الميــــلاتـــــونيــــن"هـــرمـــون النــــــوم.

"الميــــلاتـــــونيــــن"هـــرمـــون النــــــوم.

عمرك سولتي راسك على السبب لي مخليك متوازن فذاتك ؟ السبب لي مخلي الجسد ديالك منظم ومتوازن باش يتأقلم مع الظروف والمؤثرات الخارجية ؟ عمرك سولتي على السبب لي مخلي الجسد ديالك يضبط الوقت ويميز بين الليل والنهار وبين الصباح والعشية ؟...ماعرفتيش ؟..نمشيو للموضوع..

الجسد ديالنا كيفرز بزاف ديال الهرمونات لي غادة تحقق لينا واحد التوازن فحياتنا اليومية وكل هرمون والوظيفة ديالو واي خلل فهاد الهرمونات او غير نقص صغير يقدر يأدي بينا لمخاطر لا تبشر بالخير...من بين هاد الهرمونات غادي نهضر ليكم على واحد الهرمون مهم بزااف لي هو "الميلاتونين" أو "هرمون الليل" أو "ساعة الجسد"...

"الميلاتونين" عندو بزاف ديال سميات بحال "هرمون النوم" و هرمون السعادة، موهيم هاد الميلاتونين كاتفرزو لينا واحد البلاصة سميتها "الغدة الصنوبرية" هاد البلاصة كاينة فاللخر ديال "الغدة النخامية" فالدماغ ديالنا، هاد الميلاتونين كيتكون من بزاف ديال الغازات لي هي الكربون والاكسجين والهيدروجين والنيتروجين..هاد الغدة الصنوبرية لي فالدماغ كتفرز لينا هاد الغازات فالفترة ديال النعاس يعني فاش كتكون ناعس الغدة الصنوبرية ديالك أوطوماتيكيا كتبدا تفرز هاد الغازات...شنو الدور ديال هاد الميلاتونين ؟

هاد الميلاتونين هو لي كيخليك تنعس هو بحال الساعة ديال الجسم ديالك حيت هو لي كيتحكم فالرغبة ديالك فالنعاس وهو لي كينظم دورة النوم فالجسم ديالك...هاد الميلاتونين هو لي كيعاون الدماغ ديالك باش يعرف را وقت النعاس وصل يعني هاد الميلاتونين كيحدد لدماغك وقت النوم ووقت الاستيقاظ وهو لي كيخلي الجسد ديالك يميز بين الصباح والعشية والنهار والليل والانعدام ديال هاد الهرمون غايتسبب فالخلل للجسم ديالك فتحديد اوقات النوم حيت هاد الهرمون هو لي كيربط دورات النوم ديالك مع نظام التوقيت الخارجي يعني كيربط الساعة ديال الجسم مع الساعة لي عندك فيدك وفتيليفونك.. 

الجسد كيفرز هاد الهرمون فقط فالظلام والليل وكيحبس فعملية الإفراز مع الفجر بالضبط باش يساعد الجسد ديالك على الإستيقاظ..ومايمكنش للجسم ديالك يفرز هاد الهرمون ايلا كنتي جالس فالضو فالليل، كيفرزو ولكن بنسب قليلة وضعيفة بزااف..وحتى ايلا كنتي كتفرج ولا مكونكطي فبيسي ولا تلفون فالليل كتكون معرض لاضطرابات النوم حيت هاد الضو ديال تلفون وتلفازة وبيسي كلهم كيأثرو فالعملية ديال افراز الميلاتونين حيت الجسد فهاد الحالة كيتخدع وكيحساب ليه بلي باقي النهار ومازال موصلش وقت النعاس يعني كيوقع واحد الاضطراب فالنظام النومي والساعة ديال الجسم ديالك...كيفاش نتجاوزو هاد الأمر ؟

اولا خصك تحدد الوقت لي كتنعس فيه ديما وماتفوتوش يعني كتنعس مع 12 خصك مع 11:30 ولا 11:00 طفي تيليفون وطفي الضو حيت هاد ساعة ولا نص لي قبل من موعد النوم هي لي غيستغلها الجسد ديالك باش يفرز الميلاتونين لي غادي يسهل عليك عملية النوم، وخصك تنقص من الضوو ومتبقاش ديما خاشي عينيك فتيليفون ولا بيسي ولا تلفازة وخصك تنظم وقتك لي كاتنعس فيه ديما وخصك متبقاش تشرب القهوة فالليل وخصك تبقى تنعس بكري تاكل بعض الفواكه لي كتساعد على إفراز الميلاتونين بحال الاناناس والبنان وليمون وبعض الخضراوات بحال ماطيشة..

هاد الميلاتونين ايلا كان الجسد ديالك فرزو بواحد النسبة كبيرة را غادي تغرق فالنعاس واحد المدة طويلة مثلا كنتي كتنعس 8 سوايع تقدر تولي تنعس تال 14 ساعة وكثر وكاينة حاجة خرى مثلا كان الجسم ديالك كيفرزو وشعل شي حد الضو الجسم ديالك اوطوماتيكيا كيوقف العملية ديال الإفراز وبعض المرات كتبقى تشقلب فبلاصتك ومكيبغيش يجيك النعاس هنا السبب راجع لقلة هرمون الميلاتونين فالجسم ديالك..هاد الميلاتونين كاين حتى عند الحيوانات وهو لي كيخليها تميز بين الفصول بين الشتاا والصيف..الخ.. 

كاينين شي حوايج لي كيمنعو الافراز ديال هاد الميلاتونين بحال النعاس بالنهار وتناول بعص المشروبات لي فيها الكافيين والنعاس فالبلايص لي فيها الضو وتناول المأكولات لي فيها الدهون فالعشاااء واخيرا تخراج العينين فتيليفون قبل فترة النوم بمدة قليلة لذلك قبل ماتنعس بواحد ساعة ديال الماگانة طفي المشقوف باش تخلي الجسد ديالك يفرز الميلاتونين لي غايخليك تنعس آليز...موهيم هادشي لي كاين حاولت نعطيكم فكرة على هاد الهرمون، نتمنى يعجبكم الموضوع وكالعادة نتقاشعو فشي موضوع خر ايلا كتاب.

بقلــم: الـﺴـــــــﺎﻋــــﺮ

Gerard Lopez