"أسطـــــــورة عيشــــــة قنـــــديــشــــة"
الليلة ليلة الأساطير نفتتتحو السهرة بهاد الأسطورة، كلنا كنعرفو"عيشة قنديشة" شحال خلعونا بيها واليدينا فاش كنا صغار ولكن مكناش كنعرفوها شكون ومكناش كنعرفو اش كدير من غير انها كاتخلع وصافي وايلا بقينا نديرو صداع غاتجي لينا...
"عيشة قنديشة" أو "عيشة الكونتيستة" أسطورة من التراث الشعبي المغربي، هاد عيشة قنديشة هي واحد المرا شارفة سحارة كان الهدف ديالها هو تفرق الأزواج وكانت كتسيف ف"بغلة" (بغلة المقبرة) وكاين لي كيقول بلي كانت جنية..الأسطورة كتقول بلي "عيشة قنديشة" كانت كتسيف على شكل مراا زوينة وعندها رجلين بحال ديال البغلة، وكانت كاتغر الرجال بزين ديالها وكتخليهم يجيو عندها وتمارس معاهم الجنس ومن بعد تقتلهم وتاكل من لحمهم وكانت كتخاف من العافية، وكتعاود عليها واحد ليسطوار بلي كانت تلگات لشي رجال فشي عروبية وملي شافو رجليها عرفوها وناضو شعلو العافية وهربات...
شكوناهيا هاد "عيشة قنديشة" ومنين جات ؟؟..كيقولو بعض الروائيين بلي "عيشة قنديشة" شخصية حقيقية جات من الأندلس الأصل ديالها من واحد العائلة موريسكية ومن بعد جراو عليها من تما، "عيشة قنديشة" كترجع للقرن 15 شاركات فالحرب مع الجيش المغربي ضد البرتغاليين...منين جات هاد سمية "قنديشة" ؟ البرتغاليين فداك الوقت كانو كيلقبوها ب"الأميرة عيشة" وكانو كيلقبوها ب "عيشة قونديشة" يعني "عيشة كونتيسة" ....عيشة قنديشة دارت بلاصتها مع المجاهدين ضد الاحتلال البرتغالي ماشي بالسلاح لا لا بالسحر والشعودة والتسيف..
نستحضرو بعض الانثربولوجيين وعلماء الاجتماع لي دارو بحوث على هاد الأسطورة كيقول الانثربولوجي "وستر مارك" بلي هاد الأسطورة كاترجع للمعتقدات التعبدية القديمة وربط الشخصية ديال "عيشة قنديشة" بواحد الآلهة "عشتار" آلهة الحب هاد الآلهة كانو كيقدسوها الشعوب ديال البحر الابيض المتوسط وبلاد الرافدين وقرطاج والفينيقيين والكنعانيين، وكانو كيديرو شي طقوس ديال الدعارة زعما تقديسا لها وكيقول الأنتربولوجي "وستر مارك" بلي "عيشة قنديشة" كانت كتعيش فالمناطق الرطبة وحدا البحار والوديان وربما عيشة قنديشة هي "آلهة السماء" عند الساميين القدامى حيت كان عندهم اعتقاد بلي آلهة السماء كتعيش فنفس المناطق لي كانت كتعيش فيهم "عيشة قنديشة"..
نشوفو دابا عالم الاجتماع "بول باسكون" اش قال على "عيشة قنديشة"..."بول باسكون" كان دار بحث على عيشة قنديشة وكتب عليها فواحد الكتاب سميتو "أساطير ومعتقدات من المغرب" فهاد الكتاب كيهضر "بول باسكون" على واحد الأسطورة على واحد الأستاذ أوروبي كيقري الفلسفة فواحد لافاك فالمغرب، هاد الأستاذ كان كيوجد البحث ديالو على "عيشة قنديشة"عادي ماعليه مابيه حتى بداو يوقعو ليه مشاكل وبدى يتعرض لحواذث متتابعة، واحد نهار ناض هاد الأستاذ حرق كاع داكشي لي كتب وحرق داك البحث لي دار على "عيشة قنديشة" وجمع حوايجو وخرج من المغرب بدون مبرر ومعرفوش علاش...موهيم هادي هي أسطورة "عيشة قنديشة"لي كانو كيخلعوك بيها فاش كنتي صغير...
بقلــم: الـﺴـــــــﺎﻋــــﺮ
Commentaires