"بــــــــراهـــــــــــام لينكـــــــــولـن و ثــــورة العبيـــــــــد

"بــــــــراهـــــــــــام لينكـــــــــولـن و ثــــورة العبيـــــــــد"

كنسمعو بالعبودية ولكن الحاجة الوحيدة لي كنعرفو عليها انها احتقار للبشرية، ولكن لي معارفينش الاغلبية ان هاد العبودية كانت نظام قانوني عند بعض الدول والمستوطنات فواحد الوقت...نمشيو للموضوع

كيف قلت ليكم العبودية كانت نظام قانوني واقتصادي فميريكان يعني فاش انا غانجيب واحد 10 ديال العبيد كايدخلو فالملكية ديالي نتصرف فيهم كيما بغيت ويخدمو عندي فابور حيت هادشي قانوني فداك الوقت..نرجعو للتاريخ لور، العبودية بانت اول مرة فعام 1619 بالضبط فالمستعمرة البريطانية "فرجينيا" فأمريكا الشمالية، كانو المستعمرات ديك ساعة خاصهم بنادم لي يخدم فالزراعة والتبغ والقطن والفلاحة ناضو بداو يشريو العبيد الأفارقة ويحرثو بيهم كيما بغاو ويديرو فيهم مابغاو، ومن بعد نتاشرات هاد تجارة العبيد أو تجارة الرق فميريكان كاملة على نطاق واسع وشوية بشوية حتى تحولات العبودية من تجارة لنظام قانوني اقتصادي جاري بيه العمل ولي غادي يحول هاد العبيد من بشر إلى ممتلكات عند المالكين والملعقين...

من بعدما نتاشرات تجارة الرق فميريكان بداو كيستوردو العبيد بما فيهم رجال ونساء وجابوهوم خدموهوم فالتبغ والقطن والأرز وقدروهوم المؤرخين بأكثر من 7 المليون ديال العبيد لي استوردوهوم من افريقيا لأمريكا...فداك الوقت فالقرن 17 ميريكان كانت مخلطة، فيها المستعمرين البريطانيين والمراكنة والعبيد الافارقة وفهاد الفترة بالضبط غاينوض تشنشيط....

نرجعو لعام 1770 فهاد الفترة شي جنود ديال الانجليز غادي يتيريو فشي مراكنة وغايقتلو شي 5 منهم ومن بين هاد الخمسة كاين واحد العبد سميتو "كريسبوس اتكس" من العبيد السود هاد المجزرة غادي يستغلوها الثوار المراكنة وغادي يدخلو فالحرب مع الانجليز باش ياخدو الاستقلال ديالهم ونوضوها قرطاس ودمايات لمدة 8 سنين تال 1783 غادي يوقفو الحرب وغادي ياخدو المراكنة الاستقلال ديالهم من بعدما عقدو معاهدة باريس واعتارفات فيها بريطانيا بالاستقلال ديال ميريكان، هاد الاستقلال مكانتش ميريكان غادة تحلم بيه كون ما الدعم ديال السود الأفارقة..

واخا خدات ميريكان الاستقلال العبيد السود بقات حالتهم كيما هي يعني بقاو مستعبدين، هنا طبعا العبيد ماغديش يبقاو ساكتين وغينوضو بزاف ديال الثورات باش يتحررو من هاد العبودية ومن بين هاد الثورات ثورة "غابرييل بروسر" ف1800 وثورة "دينمارك فيسي" ولكن اكبر ثورة خلقات الرعب فالمراكنة هي ثورة "نات تيرنر" لي دارها "تيرنر" ف فيرجينا فعام 1831 هاد السيد جمع شي 75 واحد من العبيد وسلحهم وهجمو على المراكنة البيض وقتلو منهم 60 واحد فمدة يومين هادشي كان مزيان من جهة ولكن من جهة خرى حقدو المراكنة وبداو يعدبو فالعبيد لخرين لي مادارو والو ووصفوهم بالهمجيين والمتوحشين وبلي العبودية هي لي تليق ليهم...الخ

ولكن مع ذلك الثورة مغاداش توقف وغايجيو شي ناس وغايديرو واحد الحركة ديال إسقاط العبودية هاد المرة الحركة فيها بعض المؤيدين البيض لي مراضينش على الاحتقار لي كيتعرضو ليه العبيد السود من بين هاد ناس كاين واحد الصحفي سميتو "ويليام لويد جاريسون" وواحد السيد خر "هارييت بيتشر ستو" لي كتب واحد الكتاب كيدعم فيه ثورة العبيد ومناهضة العبودية فهاد الفترة العبيد مغديش يبقاو يتفرجو وغيبداو يعاونو بعضياتهم باش يهربو من المزارع الجنوبية حتى هربو اكثر من 40 ألف ديال العبيد للشمال حيت الشماليين كانو كيعارضو العبودية على عكس الجنوب لي كيأيدوها، وف1859 غادة تنوض ثورة خرى دارها واحد السيد سميتو "جون براون" من بعدما هجم على واحد القاعدة عسكرية ولكن فلخر شدوه وعدموه...

فهاد الفترة غادي يخرج واحد البلان اخر من جنب لي غادي يشعل العافية فأمريكا، من بعد الثورة لي داروها المستوطنين ديال "تكساس" على المكسيس ونفاصلو عليها غادي يطلبو ميريكان باش تقبل طلب الانضمام للولايات المتحدة الامريكية حيت فديك الفترة ديال 48 كان تشنشيط نايض بين ميريكان والمكسيك وتنازلات فيه المكسيك لميريكان على "كاليفورنيا و نيو مكسيكو و يوتا" ودابا جات "تكساس" حتى هي بغات تدخل مع ميريكان هنا غاينوضو المسؤولين ديال الجنوب وغايطلبو باش يوليو هاد المدن كولايات ديال العبيد يعني يدخلو معانا ولكن يكونو عبيد ولكن الشماليين رفضو الطلب وقالو ليهم بلي بغينا هاد الولايات يكونو احرار وف1850 تافقو باش تكون كاليفورنيا ولاية حرة والولايات لخرين يختارو لي بغاو يعني اما ينضمو لولايات العبيد (الجنوب) ولا لولايات الاحرار (الشمال)..من بعد تاني غادي يجيو مناطق خرين يطالبو بالانضمام للولايات الحرة لي هوما "كنساس" و"نبراسكا" هنا غينوضو الجنوبيين وغايرفضو وغايقولو ليهم نخليو الخيار للمجلس التشريعي فالولايات بجوج ولي قالوها نديروها ودفعو الطلب للغونغرس وحيت كانو الاحرار مرخيين خسرو الضوصي وخداو الجنوبيين الموافقة ديال الكونغرس وبالتالي رجعات العبودية تاني فشي مقاطعات وطاح حزب "الويج" فالشماال وطلع حزب جديد لي هو "الحزب الجمهوري" وناض التشرشيم والقرطاس بين المؤيدين والمعارضين للعبودية و وبالثالي ناضت الحرب الأهلية الدموية لي ماتت فيها أمة ديال البشر...

فهاد الفترة غادي يوقعو شي انقسامات بين الشمال والجنوب فالإنتخابات، وغيتقسمو على 4، الديمقراطيين الجنوبيين لي كيأيدو تجارة الرق العبيد، والجمهوريين لي كيعارضوها وكيعارضو العبودية، والديمقراطيين الشماليين لي كيأيدو الديمقراطية الدولية يعني حرية الدولة فاتخاد القرارات، واخيرا الحزب الدستوري لي كيأكد على اهمية وحدة البلاد فوق كلشي واي حاجة خرى كتبقى مسألة ثانوية...هنا غادي ينوض صراع بين الإتحاد لي هي ميريكان والإنفصاليين هاد الانفصاليين كيتكونو من 11 ولاية جنوبية كيتسماو "الولايات الكونفدرالية الامريكية" لي هوما (الديمقراطيين الجنوبيين) وقبل من هادشي اينفوا تولى "براهام لينكولن" الرئاسة ديال البلاد انفاصلو 7 ديال الولاياات فالحرب الأهلية ومن بعد الحرب نفاصلو 4 خرين وانضمو للولايات الكونفدرالية...هنا غينوضو الانفصاليين وغيهجمو على "لينكولن" باش يفرضو ريوسهم ويعتارفو بيهم صحة كولاية ولكن حتى واحد ماعتارف بيهم من غير الانجليز وفرنسا..."براهام لينكولن" كان الهدف ديالو هو يحرر العبيد أولا وفنفس الوقت يبقى مركز على الحرب وبقى كيسايس معاهم ومن بعدما ربح الحرب ف"أنتيتام" آمرهم باش يحررو العبيد وحررو حوالي 3 المليون ديال العبيد هادشي حفز بزاف ديال العبيد لي ضرباتهم النفس وانضمو للجيش ديال "لينكولن" حوالي 186 الف واحد وماتو منهم حوالي 38 الف وماتو حوالي 720 ألف واحد فهاد الحرب كعدد إجمالي بما فيهم المعارضين والمؤيدين...

 وف 1865 استسلمو الإنفصاليين (الولايات الكونفدرالية) من بعدما شرشمهوم "لينكولن" وسالات الحرب وتحررو حوالي 4 المليون ديال العبيد بالإعلان ديال براهام لينكولن ومن بعد عاود دمجهم ودار ليهم إعادة الإعمار ورجع للعبيد حقوقهم وكرامتهم وعاشو بسلام وكتعتابر هادي أكبر مجزرة بشرية دازت فتاريخ الحرب....موهيم هادشي لي كاين هذا اول موضوع ليا من بعد الغياب نتمنى يكون فالمستوى ولي عندو شي اضافة يزيدها وكالعادة نتشاوفو فشي موضوع جديد.

بقلــم: الـﺴـــــــﺎﻋــــﺮ
Gerard Lopez