تحميل الكتاب
"تــــزمــــامـارت الـــزنـــزانـــــة رقـــــم 10"
<
هاد الكتاب كيتعتابر خير شهادة على داكشي لي كان كيوقع فالكواليس ديال سجن تزمامارت بما فيها الأمراض والتعذيب والتكرفيص لي تعرضو ليه دوك الناس فداك الوقت..نمشيو للموضوع
هاد الكتاب كاتبو واحد السيد مواطن مغربي سميتو "احمد المرزوقي" ضرب 18 عام ديال الحبس فسجن تزمامارت لي كان مجرد أسطورة وكذبة لا اساس لها من الصحة عند بزاف ديال الناس، هاد 18 عام ضربها هاد السيد غير هكاك فابور هو وبزاف بحالو وكيحكي فهاد الكتاب على الظروف والكواليس لي كانت كاتوقف فتزمامارت وكيحكي على البلان من اللول يعني السيناريوهات ديال الانقلاب لي مكان عارف عليه والو لا هو لا غيرو باستثناء رؤوس الحربة "أعبابو" و"المدبوح"...
ف1971 غادي يدبر المذبوح واعبابو للانقلاب على الحسن الثاني وطبعا حتى واحد مكان عارف هاد البلان من غيرهم، ناضو استغلو الطلاب ديال مدرسة اهرمومو العسكرية باش ينفدو بيهم الانقلاب وقالو ليهم بلي باغين يديرو واحد الدورية كيف العادة ولكن هاد المرة فهاد المهمة غادي نشدو شي ناس باغين ينوضو الفتنة فشي مناطق فالصخيرات يعني شي ثوريين خصنا نهجمو عليهم، هادي هي الكذبة لي صنعها اعبابو والمذبوح حيت كون قالو ليهم غنديرو انقلاب غايرفضو موهيم هادو كلهم تقريبا معارفينش القصر ديال الملك فين جا فصخيرات، ملي وصلو تما بداو فالتشرشيم بالقرطاس على القصر ودخلو للقصر بالاوامر ديال المدبوح وملي دخلو تصدمو لقاو ريوسهم كينفدو فالانقلاب بلا ميعرفو هنا حسو بريوسهم ضحايا حيت قولبهم المدبوح واستغلهم ولكن ماعرفو مايديرو وشبكوها قرطاس حيت حتى داك الوقت لي غتحتاجو باش تحلل هاد الخدعة فداك الموقف وفداك الجو ديال القرطاس مكاينش...
الكاتب "المرزوقي" كيعاود فهاد الكتاب على ظروف الانقلاب والفشل ديال محاولة الانقلاب وكيفاش تعدمو كاع لي ساهمو فيه بما فيهم الجنرالات والضباط الكبار ودوك لي مشاو غا هكاك في حين حولو لخرين دوك ريوس صغار للمحكمة وغبروهوم فالحبس ومن بعد عامين بداو كيخطفو فيهم من الحباسات وكيدووزوهم لسجن الموت "تازمامارت" لي صايبو الحسن الثاني خصيصا ليهم باش يغبرهم فيه...
المرزوقي فواحد الفصل فهاد الكتاب غادي يبدى يحكي على دوك 58 واحد لي كانو معاه وكيعاود على الظروف لي عاشو واحد بواحد تما والتعذيب لي تعرضو ليه حتى ماتو ودفنوهوم فوسط تزمامارت وكانو كيحبسو عليهم الدواا وحتى الماكلة قليلة ومكيعطيوهمش باش يتغطاو لدرجة كانو كيجريو وسط الحبس باش يسخنو وكيعاود على شي وحدين ماتو غا بالبرد وشي وحدين نتاحرو حيت مقدروش يتقبلو داكشي لي كيوقع تما...المرزوقي بصفة عامة كيعاود على داكشي لي كان كيوقع فتزمامارت ودكر شي لعيبات بحال شي رموز لفظية باش يتواصلو بيناتهم يعني شي لغة لي يغهموها غير هوما باش حراس السجن مايفهمو والو...
المرزوقي فالكتاب كيعاود على بعض الحراس لي تعاونو معاهم باش يتواصلو مع عائلاتهم الشيء لي خلا هاد الحبس يتعرف ويعرفو الناس بلي تزمامارت ماشي كذبة والشيء لي خلا الناس والجمعيات يضغطو على السلطة باش يطلقو سراحهم في حين الدولة كانت كتنكر هاد تازمامارت وكتقوليهم مكاين حتى شي حبس بهاد سمية وهادشي مكاينش وغير كدوب...الخ ومع ذلك بقى الرأي العام الفربي والجمعيات والزوجة ديال المرزوقي كيضغطو على الدولة حتى طلقو سراحهم بزز وكيعاود حتى على وزارة حقوق الانسان لي كانو كيواعدوهم بتعويضات ومن بعد بداو كيقلبو عليهم وجوههم بخصوص التعويضات المالية للمعتقلين وتأمين السكن وتوفير فرص عمل...
الكتاب بصفة عامة عبارة عن فيلم كيعاودو المرزوقي بداية من الانقلاب ف71 تال اغلاق تزمامارت مع ذكر التعذيب والتكرفيص لي تعرض ليه هو وصحابو....موهيم هادشي لي كاين حاولت نعطيكم فكرة ملخصة على هاد الكتاب ولي بغاه انا نقلب ليكم عليه بي دي إف...كالعادة نتشاوفو فشي بلان خر...بيس تحميل الكتاب
تحميل الكتاب
بقلــم: الـﺴـــــــﺎﻋــــﺮ
Gerard Lopez
Commentaires